Aqmola oblysynda Ereımentaý aýdany kúni atalyp ótti
KÓKShETAÝ.QazAqparat-Aqmola oblysynda Ereımentaý aýdany kúni atalyp ótti, dep habarlaıdy QazAqparat tilshisi.
Shara aıasynda aýdandyq Úmbeteı jyraý atyndaǵy mádenıet úıinde ǵylymı-praktıkalyq konferentsııa ótti. Oǵan arnaıy kelgen Astana qalasyndaǵy L.Gýmılev atyndaǵy Eýrazııa Ulttyq ýnıversıtetiniń bir top ǵalymdary jáne Astana, Almaty, Qaraǵandy, Kókshetaý qalalary men Pavlodar, Qostanaı, Ońtústik Qazaqstan oblystarynyń zııaly qaýym ókilderi, el azamattary, óskeleń urpaq jastar da qatysty. Atalmysh shara aıasynda «Qanjyǵaly» shejire kitabynyń tusaýkeseri bolyp ótti.
Saltanatty sharada aýdan ákimi Ermek Nuǵymanov Ereımentaý aýdanynyń qurmetti azamaty, Eýrazııa Ulttyq ýnıversıtetiniń kásipodaq uıymynyń tóraǵasy Talǵatbek Janaıdarulyn mereıli 70 jasqa tolýymen shyn júrekten quttyqtap, qazaqy dástúrmen ıyǵyna shapan jaýyp, júrekjardy tilegin bildirdi.
Jıynda L.Gýmılev atyndaǵy Eýrazııa Ulttyq ýnıversıtetiniń áleýmettik-mádenı damý jónindegi prorektory, Qazaqstan Respýblıkasy Ulttyq Ǵylym Akademııasynyń akademıgi Dıhan Qamzabekuly, tarıh ǵylymdarynyń doktory, professor Jambyl Artyqbaev, fılologııa ǵylymynyń doktory Serik Negımov, ǵalym Ámirjan Álpeıisov, fılologııa ǵylymdarynyń kandıdaty, ǵalym Qaıyrbek Kemeńger sóz sóıledi.
Saltanatty shara sońynda aýdan ákimi Ermek Nuǵymanov konferentsııa jumysyna atsalysqan ǵalymdar men zııaly qaýym ókilderine «Qanjyǵaly qart Bógenbaı» medali men eskertkish syılyqtardy tabys etip, qazaqy dástúrmen ıyqtaryna shapan japty.
Ǵylymı-praktıkalyq konferentsııadan bastaý alǵan merekelik sharalar alaman báıge syndy ulttyq sport oıyndarymen jalǵasyn tapty.
