Aqmola oblysynda erekshe bilim berý qajettilikteri bar 10 myńnan astam bala turady
KÓKShETAÝ. QazAqparat – Jyl saıyn elimizde 1 Maýsym - Halyqaralyq balalar kúni atalyp ótiledi. Stepnogor qalasynyń ákimi óńirdegi erekshe balalardy osynaý kúnmen quttyqtap, demeýshiler atynan syılyqtar úlestirdi, dep habarlaıdy QazAqparat tilshisi oblystyq ishki saıasat basqarmasyna silteme jasap.
Vedomstvonyń málimetinshe, Stepnogor qalasynda múgedek balalarǵa jáne psıhonevrologııalyq aýrýlary bar 18 jastan asqan adamdarǵa úıde arnaýly áleýmettik qyzmet kórsetý bólimshesi jumys isteıdi.
Qyzmetterdi 13 áleýmettik qyzmetker, bólim meńgerýshisi jáne konsýltant usynady. Balalardy áleýmettendirý úshin bólimshe mamandary qamqorlyqtaǵylardyń bos ýaqytyn uıymdastyrady. Ol úshin ústel oıyndaryn, kitap oqýdy paıdalanady, kitaphanalyq qyzmet kórsetýdi, tanymdyq ekskýrsııalardy, túrli qolóner buıymdaryn jasaýdy uıymdastyrady, «Sheber qoldar» úıirmesiniń sabaqtary ótkiziledi, onda balalar áleýmettik qyzmetkerlermen birge qolóner, oıynshyqtar jasaıdy.
Osy kúni demeýshilik qarajat esebinen erekshe balalar quttyqtalyp, demeýshiler atynan syılyqtar úlestirildi. Atap aıtqanda, «Qazaqaltyn TKMK» AQ, «Enterpraız» JShS turaqty negizde tátti syılyqtar usynady, «Amanjol_M» JShS - 2019 jyly qysqy kombınezondar, 2020 jyly sporttyq kostıýmder, 2021 jyly tósek-oryn jıyntyqtary, tátti syılyqtar, «Astana - Nan Chemicals» JShS bólimshe úshin 15 jańa oryndyq satyp alý boıynsha kómek kórsetti.
«Karantın jaǵdaıyna baılanysty búgin barlyq balalardy shaqyrýǵa múmkindik bolmady, qala ákimi erekshe balalarǵa syılyqtardy tabys etti, qalǵannyn volonterler jáne áleýmettik qyzmetkerler taratyp beretin bolady», - deıdi qalalyq jumyspen qamtý jáne áleýmettik baǵdarlamalar bóliminiń mamandary.
Aıta keteıik, aımaqta erekshe bilim berý qajettilikteri bar 10 myńnan astam bala turady. Olarǵa erekshe kóńil bólinip, jergilikti uıymdarmen qajetti kómek kórsetilip keledi.
Eske sala keteıik, shara QR Táýelsizdiginiń 30 jyldyǵyna arnalǵan «Qaıyrymdylyq ister marafony» aıasynda ótkizildi.
