Aqmola oblysynda er adam 6 jasar qyzymen birge sarqyramaǵa qulap ketti
KÓKShETAÝ. QazAqparat - Aqmola oblysynyń Zerendi aýdanynda sýretke túspekshi bolǵan er adam men 6 jasar qyzy Úlgili sarqyramasyna qulap ketti, dep habarlaıdy QazAqparat tilshisi.
Bul týraly áleýmettik jelide beınejazba jarııalandy. Onda Zerendi aýdanyndaǵy Úlgili sarqyramasynda qyzymen birge er adamdy sý aǵyzyp kele jatqandyǵyn kórýge bolady.
Zerendi aýdany ákiminiń baspasóz qyzmetinen habarlaǵandaı, sarqyramaǵa qulaǵan adam Kókshetaý qalasynyń turǵyny. Sarqyramada sýretke túspekshi bolǵan er adam 6 jastaǵy qyzymen birge abaısyzda sýǵa qulap ketken. Olarǵa kýágerler kómek qolyn sozdy.
«Keshe, sáýirdiń 17-sinde saǵat 16:35-te Zerendi aýdandyq aýrýhanasynyń qabyldaý bólimine kókshetaýlyq 2015 jyly týǵan qyz bala tústi. Ol jeńil jaraqtan aldy, medıtsınalyq kómek kórsetilgen soń úıine jiberildi», - dep túsindirdi aýdan ákimdiginen.
Ákimdiktiń málimetinshe, budan basqa zardap shekkender bolǵan joq.
