Aqmola oblysynda epıdemıologııalyq jaǵdaı áli de kúrdeli - Ermek Marjyqpaev
KÓKShETAÝ. QazAqparat - Aqmola oblysynda epıdemıologııalyq jaǵdaı áli de kúrdeli. Bul týraly aımaq basshysy Ermek Marjyqpaev onlaı rejımde ótip jatqan óńirdiń áleýmettik-ekonomıkalyq damýynyń qorytyndysy týraly esep berý kezdesýinde aıtty, dep habarlaıdy QazAqparat tilshisi.
«Ótken jyl bárimiz úshin ońaı bolǵan joq, bul eń aldymen koronavırýs ınfektsııasyna baılanysty. Búgingi tańda oblystaǵy epıdemıologııalyq jaǵdaı áli de kúrdeli. Biz «qyzyl aımaqta» turmyz», - dedi Ermek Marjyqpaev.
Aımaq basshysy atap ótkendeı, óńirde koronavırýs ınfektsııasymen kúresý úshin qajetti dári-dármek pen medıtsınalyq preparattardyń eki aılyq qory jedel tolyqtyrylýda.
«Infektsııanyń taralýyn boldyrmaý baǵytynda shekteý sharalary qabyldandy. Karantın rejımi kúsheıdi. Infektsııalyq statsıonarlardaǵy tósek oryndar sany ulǵaıtyldy, reanımatsııalyq palatalar barlyq qajettiliktermen jabdyqtalǵan. Dári-dármektiń eki aılyq qory jedel tolyqtyrylýda.
Oblysta «Spýtnık V» vaktsınasymen kezeń-kezeńmen vaktsınalaý bastaldy. (búgingi kúni 690 adamǵa vaktsına egildi). Jalpy, epıdemıologııalyq jaǵdaı baqylaýda», - dedi Ermek Marjyqpaev.
Aıta keteıik, bir apta ishinde óńirde koronavırýs ınfektsııasyna shaldyqqandar sany ortasha 1,1 paıyzǵa (934 jaǵdaı) ósip otyr. Al, sońǵy táýlikte bul kórsetkish 0,8 paıyzǵa artty nemese 95 jaǵdaı tirkelip otyr. Qazirgi kezde, statsıonarlarda 611 adam em alýda, onyń ishinde 21 adam aýyr halde (1 – ókpeni jeldetý apparatyna qosylǵan).
