Aqmola oblysynda eńbek áýletteri, kópbalaly jáne berik otbasylar marapattaldy
KÓKShETAÝ. QazAqparat - Aqmola oblysynda Otbasy kúni qarsańynda eńbek áýletteri, kópbalaly jáne jarty ǵasyrdan astam nekede turǵan otbasylarǵa syı-sııapat jasaldy, dep habarlaıdy QazAqparat tilshisi.
Dostyq úıinde uıymdastyrylǵan kezdesýde quttyqtaý sóz alǵan oblys ákiminiń orynbasary Aına Mysyrálimova sanaly urpaq tárbıelep, elimizdiń keleshegi – jastarǵa úlgi-ónege bolyp júrgen otbasylardy oblys ákimi Ermek Marjyqpaevtyń atynan quttyqtap, ystyq sálemin jetkizdi.
«Berik otbasylarda baqytty balalar ósip keledi, qoǵamnyń adamgershilik negizderi saqtalady, saıyp kelgende, óńir men búkil eldiń ál-aýqatynyń negizi qalanady», - dedi Aına Mysyrálimova.
Sharada dárigerler otbasynan Fılatovtar, úsh urpaǵy temirjolshy mamandyǵyn tańdaǵan Nurtazınder áýleti, polıtsııa áýletinen Jaqsylyqovtar, jarty ǵasyrdaı juptary jazylmaı kele jatqan Muqanovtar áýleti jáne arystaı úsh ul men altyn asyqtaı qyzdaryn tárbıelep otyrǵan Tólebaı otbasylary qatysyp, qurmet pen qoshemetke bólendi.
Vıktor men Lıýdmıla Fılatovalar – densaýlyq saqtaý isiniń úzdikteri. Búginde sol áýlettiń eńbek jolyn jalǵastyryp kele jatqan qyzdary Vıktorııa Vıktorovna Pıchkýnova Aqmola oblystyq balalar juqpaly aýrýlary aýrýhanasynyń shtattan tys bas mamany.
Úsh urpaǵy temirjolshy mamandyǵyn tańdaǵan Nurtazınder otbasynyń otaǵasy Bolat Qaharmanuly «Qurmetti temirjolshy» bolsa, zaıyby Marııa Bekesheva da ómiriniń 40 jyldan astamyn osy salaǵa arnaǵan. Uldary Arman Nurtazın temirjol transportynda eńbek jolyn 1990 jyldan bastasa, onyń zaıyby Qymbat Nurtazınanyń «Qazaqstan temir joly – Júk tasymaly» aktsıonerlik qoǵamynyń personalmen jumys bóliminde eńbek etip kele jatqanyna 20 jylǵa jýyqtap qalǵan. Al, olardyń qyzdary Mádına Armanqyzy osy atalmysh salanyń óndiristik bóliminiń terrorızmge qarsy, azamattyq qorǵaý jáne tótenshe jaǵdaı boıynsha birinshi sanatty ınjener laýazymynda jumys isteıdi.
Polıtsııa áýleti – Jaqsylyqovtar otbasy músheleri ardager atalarynyń jolyn jalǵastyryp otyr. Onyń bes balasy men eki nemeresi búginde ishki ister organdarynyń beldi qyzmetkerleri.
Krasnoıar aýylynnan kelgen Muqanovtar otbasy jarty ǵasyrdaı juptary jazylmaı, qol ustasyp keledi.
Al yntymaqty Tólebaı otbasysy 4 bala tárbıelep otyr.
Shara sońynda oblys ákiminiń atynan atalmysh otbasylarǵa estelik syılyqtar tabys etti.
