Aqmola oblysynda eń úzdik áleýmettik joba anyqtaldy
Atalmysh kórme oblysymyzda osymen úshinshi jyl qatarynan ótkizilip otyr. Ótken jyly «Men bárin isteı alamyn! Meniń qolymnan bári keledi!» atty jobany usynǵan Kókshetaý qalasyndaǵy psıhonevrologııalyq aýytqýlary bar múgedek balalarǵa jáne tirek-qozǵaltqyshtyq apparaty buzylǵan múgedek balalarǵa medıtsınalyq áleýmettik kómek kórsetetin mekeme baıqaý jeńimpazy atanǵan bolatyn. Bıylǵy jyly baıqaýǵa jeti joba qatystyrylyp otyr.
Olardyń basym kópshiligi - ómirde qıyn jaǵdaıǵa tap bolǵan múgedek balalardy ońaltý, qoǵamda óz oryndaryn tabýǵa kómektesýdi maqsat etken jobalar. Jınalǵandar aldynda quttyqtaý sóz sóılegen oblystyq jumyspen qamtýdy jáne áleýmettik baǵdarlamalardy úılestirý basqarmasy basshysynyń orynbasary Sholpan Rahmatýllına múmkindigi shekteýli jandardy ońaltý maqsatynda jyl saıyn oblystyq bıýdjetten qomaqty qarjy bólinip kele jatqanyn aıta kele, búgingi kúni oblys aýmaǵynda 20 myń múgedek tirkelgenin jáne osy salada eńbekterimen kózge túsken birqatar úkimettik emes uıymdardy erekshe atap ótti.
Olardyń arasynda «Aqkóldegi №1 balalar úıi» memlekettik mekemesi, Kókshetaýdaǵy «Shans» múgedekterdi ońaltý ortalyǵy» qoǵamdyq birlestigi, Stepnogorskidegi «Erlik» tirek qımyly apparaty buzylǵan múgedekterdiń qoǵamy men «Balapan» múgedek balalardy tárbıelep otyrǵan ata-analar qoǵamy, Atbasar qalasyndaǵy «Tselına» qoǵamdyq qory jáne Jarqaıyń aýdanyndaǵy «Aqmola oblysy múgedek balalardy qoldaý qaýymdastyǵy» qoǵamdyq birlestigi bar.
Osylaısha, qazylar alqasy aqyldasa kele, «Kókshetaý qalasy men Krasnoıar kentinde 1-shi toptaǵy múgedekterge jáne 18 jasqa tolmaǵan qozǵalyp júrýi qıyn balalarǵa úılerine baryp, pallıatıvti kómek kórsetý ortalyǵyn uıymdastyrý» jobasyn usynǵan Kókshetaý qalasyndaǵy «Shans» múgedekterdi ońaltý ortalyǵy» qoǵamdyq birlestigin jeńimpaz dep tanydy. Endi, bul ujym aldaǵy ýaqytta irikteýden ótse, Shymkent qalasynda ótetin respýblıkalyq kórmede oblys namysyn qorǵaıtyn bolady. 
