Aqmola oblysynda elimizdegi eń iri qus fabrıkasy salynýda
KÓKShETAÝ. QazAqparat - Aqmola oblysynyń Bulandy aýdanynda Indýstrııalandyrý kartasy aıasynda elimizdegi jáne Ortalyq Azııadaǵy eń iri qus fabrıkasynyń qurylysy júrgizilýde. Bul týraly aımaq basshysy Məlik Myrzalınniń aýdanǵa jumys sapary barysynda aıtyldy, dep habarlaıdy «QazAqparat» HAA tilshisi.
«Makınsk qus fabrıkasy» JShS-niń dırektory Alekseı Shevchenkonyń aıtýynsha, tiri salmaqtaǵy jyldyq qýaty 60000 tonnany quraıtyn bolashaq qus fabrıkasy 2015-2019 jyldar aralyǵynda eki kezeńmen salynyp bitpek. Jobaǵa quıylatyn ınvestıtsııanyń kólemi 41 mıllıard teńgeden astam shamasynda bolmaq.
Jobany júzege asyrý barysynda «QR 2015-2019 jyldarǵa arnalǵan ındýstrııalyq-ınnovatsııalyq damý baǵdarlamasy», «Bıznestiń jol kartasy-2020» jáne «Agrobıznes-2020» tárizdi memlekettik baǵdarlamalarǵa qatysý kózdelip otyr.
«Qus fabrıkasyn salý jańadan turaqty 700 jumys ornynyń ashylýyna múmkindik beredi. Sondaı-aq, Bulandy aýdanynyń qýat kózderimen jáne sýmen jabdyqtalý júıesin nyǵaıtady jáne óńirdegi shaǵyn jáne orta bıznestiń damýyna septigin tıgizedi dep boljanyp otyr. Joba jelilik qurylys kestesine saı, aldymen ınkýbator paıdalanýǵa berilip, árqaısysynda 6 taýyq qorany biriktiretin 8 alań, qus etin jáne qaldyqtardy óńdeý zaýyty men bólimi, ekologııalyq jáne tehnologııalyq qondyrǵylardy ornatý iske asyrylady», - deıdi A.Shevchenko.
Mańyzdy jobany júzege asyrý óńirde jańa jumys oryndaryn ashyp, óndiristi damytýǵa serpin beredi dep kútilýde. Sonymen qatar, atalǵan joba Astana qalasy aınalasynda azyq-túlik beldeýin damytýǵa septigin tıgizbek.
Osy kúni aımaq basshysy «ASKOP», «Makınsk elevatory» jəne mıneraldy jylý oqshaýlaǵysh materıaldaryn shyǵaratyn «Politerm» jaýapkershiligi shekteýli seriktestikteriniń jumysyna da nazar aýdardy. Sońǵysynda bazalt taý-jynysy negizinde jylý oqshaýlaǵysh materıaly óndirisin jańǵyrtý qolǵa alynǵan. Qazirgi kezde munda jaryq, gazben jabdyqtaý, temir joldardy jóndeý boıynsha jumystar tolyq aıaqtalyp, tehnologııalyq qondyrǵylar qurastyrylýda. Sondaı-aq, jylý berý júıesin, jeldetkish, órt dabyldaǵyshyn ornatý qolǵa alynǵan.
- Kásiporyn jylyna 34 myń tonna ónim óndiretin bolady. Joba quny 6,8 mıllıard teńgege baǵalanyp otyr. Onyń 2,3 mıllıard teńgesi jeke qarajatqa qalǵany ekinshi deńgeıdegi bank arqyly nesıege alynyp otyr. Oǵan qosa, ótken jyly memleket tarapynan 2287,4 mıllıon teńge kóleminde sýbsıdııa túrindegi nesıelik qoldaý kórsetildi, - deıdi basqarma tóraǵasy Jasulan Muhametjan.
Sapar sońynda aýdan aktıvimen kezdesken oblys ákimi Málik Myrzalın Elbasynyń «Bolashaqqa baǵdar: rýhanı jańǵyrý» men «Týǵan jer» baǵdarlamalaryn júzege asyrý məselelerin talqylady.
