Aqmola oblysynda elik atqan qoryqshy ustaldy
KÓKShETAÝ. QazAqparat – Aqmola oblysynda ýchaskelik ınspektor brakonerlikpen aınalysqan qoryqshyny ustady, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń deregi boıynsha, 13 qańtarda Ereımentaý aýdandyq PB jergilikti polıtsııa qyzmeti bóliminiń ýchaskelik ınspektory «Brakoner» jedel aldyn alý sharasy kezinde Aqsýat aýyly mańynda ańshylyq sharýashylyǵynyń 40 jastaǵy qoryqshysyn qolǵa túsirdi.
«Ózine bekitilgen aýmaqty tekserý kezinde ýchaskelik ınspektor qarda júretin kólikti kózi shalyp qalady. Polıtsııa qyzmetkeri kóliktiń sońyna túsip, aýyldan shyǵa beriste qýyp jetedi. Qarda júretin kólikti tizgindegen jergilikti orman sharýashylyǵynyń qoryqshysy ekeni anyqtaldy», - deıdi vedomstvodan.
PD baspasóz qyzmetinen atap ótkendeı, jedel - tergeý toby kúdiktiden «Ij-54» markaly qosaýyz myltyq, 12 kalıbrli myltyq, eliktiń eti jáne orman sharýashylyǵyna tıesili qarda júretin kólikti tárkiledi.
«Osy oqıǵa baılanysty QR QK 337-babynyń 1-bóligi (Zańsyz ań aýlaý) boıynsha sotqa deıingi tergeý amaldary júrgizilýde. Kúdiktige «Mindetti túrde kelip otyrý» protsessýaldyq sharasy qoldanyldy», - dep tolyqtyrdy vedomstvodan.
