Aqmola oblysynda elektrmen jabdyqtaý júıesin qaıta qurý kezinde 1,3 mlrd teńgeden astam qarajat urlandy
Bul týraly Aqmola oblysy boıynsha Ekonomıkalyq tergeý departamentiniń basshysy Nurábı Tóleýtaı brıfıngte málim etti, dep habarlaıdy QazAqparat tilshisi.
Departament basshysynyń aıtýynsha, 2021 jyly qylmystyq isterdiń aıaqtalýy 65,22 paıyzdy qurady, bul aldyńǵy jylmen salystyrǵanda kóp.
«Qyzylsýat aýylynda elektrmen jabdyqtaý júıesin qaıta qurý kezinde 1,3 mlrd teńgeden astam somaǵa bıýdjet qarajatyn urlaý faktisi boıynsha (bas merdiger, qosalqy merdiger, tehnıkalyq qadaǵalaý jáne tapsyrys berýshiniń laýazymdy tulǵalary) «RemStroıServıs-PV» JShS basshylary men Tselınograd aýdany ákimdiginiń laýazymdy tulǵalaryna qatysty qylmystyq is sotqa joldandy», - dedi Nurábı Tóleýtaı.
Sonymen birge, ol Aqmola oblysy TJD basqarma basshysyna qatysty zańsyz oıyn bıznesin uıymdastyrý faktisi boıynsha laýazymdy tulǵalardyń qatysýymen qylmystyq is sotqa joldanǵanyn atap ótti.
Brıfıngte aıtylǵandaı, memlekettik baǵdarlamalardy júzege asyrý, elektr energııasymen jabdyqtaý, azyq-túlik jáne dári-dámekpen qamtamasyz etý, qarjy pıramıdasyn uıymdastyrýǵa qatysty birqatar qylmystyq ister qolǵa alynǵan.
«Tárkilengen múlikti eskere otyryp, aıaqtalǵan qylmystyq ister boıynsha ótelgen zalal somasy 1,6 mlrd teńgeni qurady», - dep túıindedi Nurábı Tóleýtaı.