Aqmola oblysynda elektrıktiń ólimine baılanysty is qozǵaldy

KÓKShETAÝ. QazAqparat – Aqmola oblysynda jumysshynyń ólimine baılanysty polıtsııa is qozǵady, dep habarlaıdy QazAqparat tilshisi oblystyq polıtsııa departamentiniń baspasóz qyzmetine silteme jasap.

Vedomstvonyń málimetinshe, sáýirdiń 21-de Zerendi aýdandyq Polıtsııa bólimine jergilikti aýyldardyń birinde 55 jastaǵy turǵyndy tok soǵyp, qaıtys bolǵany týraly habar túsken.

«Qaıtys bolǵan er adam Kókshetaý qalasynyń turǵyny, jergilikti qosalqy stantsııada jumys istegeni anyqtaldy. Osy derekke baılanysty Qylmystyq kodekstiń 156-baby 3-bóligi «eńbekti qorǵaý erejelerin buzý» boıynsha sotqa deıingi tergeý bastaldy. Sot-medıtsınalyq saraptama taǵaıyndaldy. Qaıǵyly oqıǵanyń mán-jaıy anyqtalyp jatyr», - dedi vedomstvodan.

Aıta ketsek, budan buryn Qosshy qalasynda 5 jasar balanyń terezeden qulap ketýine baılanysty polıtsııa is qozǵaǵan edi.