Aqmola oblysynda elektr stantsııasyn salý kezinde 1,3 mlrd teńge jymqyrylǵan

ASTANA. QazAqparat – Aqmola oblysynda elektrmen jabdyqtaý stantsııasyn salý kezinde 1,3 mlrd teńge somasyndaǵy bıýdjet qarajaty jymqyrylǵan. Bul týraly QazAqparat Qarjylyq monıtorıng agenttigine silteme jasap habarlaıdy.

Qyzylsýat aýylynda jańa qurylys aýmaǵyna arnalǵan elektrmen jabdyqtaý qosalqy stantsııasyn salý kezinde 1,3 mlrd teńge somasyndaǵy bıýdjet qarajatyn urlaý faktisi boıynsha Tselınograd aýdanynyń TKSh bóliminiń basshysyna jáne «RemStroıServıs PV» men «MS-Energy» JShS basshylaryna qatysty aıyptaý úkimi shyqty.

Іsti QMA Aqmola oblysy boıynsha departamenti óńirlik prokýratýramen birlesip tergedi. Qylmystyq istiń barlyq qatysýshylaryna naqty jaza, bas bostandyǵynan aıyrý taǵaıyndaldy. Sottalǵan kásipkerler men JShS qyzmetkeri kommertsııalyq jáne ózge de uıymdarda 10 jyl merzimge materıaldyq-jaýapty laýazymdardy, al TKSh basshysy ómir boıy memlekettik qyzmette laýazymdardy atqara almaıdy.

Úkim zańdy kúshine engen joq.