Aqmola oblysynda ekstremaldy realıtı-shoý túsiriledi
KÓKShETAÝ. QazAqparat - Aqmola oblysynda ekstremaldy realıtı-shoý túsirilimi bastalady, dep habarlaıdy QazAqparat tilshisi.
«Visit Aqmola» týrıstik aqparattyq ortalyǵynyń deregi boıynsha túsirilim Sandyqtaý aýdanynyń ortalyǵy Balkashıno aýlynyń mańynda júzege asyrylmaq. Onda kıiz úıler aýylyn salý josparlanǵan. Qazirgi kezde, bul jerde tuńǵysh halyqaralyq, ekstremaldy «The NOMADS» realıtı-shoýyn túsirý úshin arnaıy qalashyqtyń qurylysy júrgizilýde.
Jobany QR Aqparat jáne kommýnıkatsııalar mınıstrliginiń qoldaýymen «Kazakh TV» jáne «Habar agenttigi» AQ tapsyrmasymen «Tengrı Plıýs IS» JShS júzege asyrmaq. Sonymen qatar, jobaǵa Aqmola oblysy men Sandyqtaý aýdanynyń ákimdigi qoldaý bildirip otyr.
«Elimizde mundaı aýqymdy joba osyǵan deıin bolǵan emes», deıdi jobanyń avtory jáne bas prodıýsseri Elena Gomer.
Bul televızııalyq jobaǵa ár elden jınalǵan eki komanda 5 mıllıon teńge aqshalaı syıaqyǵa talastyn bolady. Jobanyń rejısseri máskeýlik Kırıll Kýzın. Ol «Voına polov», «Londongrad. Znaı nashıh» (2015 god), «Zaletchıkı» (2014 god), «Samyı lýchshıı fılm 3-DE» (2011god), «Klýb» (2006 - 2009 gg.), «Samyı lýchshıı fılm» (2007 god), «Lednıkovyı perıod. Detı», «Comedy Woman», «Býldog shoý», «Nerealnye ıstorıı», «ChetaPınochetov» jáne «Perehvat» tárizdi televızııalyq jobalardyń rejısseri retinde tanymal.
Jobaǵa sheteldik kez kelgen mamandyq ıesi qatysa alady. Joba júrgizýshileri qazaqstandyq bylǵary qolǵa sheberi, Olımpıada chempıony, «Astana Arlans» kásipqoı boks klýbynyń bas menedjeri Baqtııar Artaev jáne «Kazakh TV» telearnasynyń halyqaralyq aqparattar jáne aǵylshyn tilindegi jańalyqtary bóliminiń basshysy Lázzat Shataeva.
«Joba «Kazakh TV» telearnasynda qazaq, orys jáne aǵylshyn tilderinde 4 qurlyq, 118 el, 600 qonaqúıde 300 mıllıon kórermen kóredi dep josparlanǵan»,-dep tolyqtyrdy Elena Gomer.
