Aqmola oblysynda ekonomıkalyq josparly ındıkatorlar oryndaldy - ákim
NUR-SULTAN. QazAqparat – Óńdeýshi ónerkásip úlesi 82 paıyzǵa jetti. Bul týraly Aqmola oblysynyń ákimi Ermek Marjyqpaev málim etti, dep habarlaıdy QazAqparat tilshisi.
«2021 jylǵy 5 aıdyń qorytyndysy boıynsha ekonomıkanyń kóptegen baǵyttarynda josparly ındıkatorlar oryndaldy. Bizdiń maqsat – ártaraptandyrylǵan ári tehnologııalyq ekonomıka qurý. Oblys birtindep dástúrli agrarlyq baǵyttan agro-ındýstrıaldy negizge aýysyp jatyr. Óńdeýshi ónerkásip úlesi 82 paıyzǵa jetti. Investıtsııalardyń ósimi ekonomıkalyq belsendiktiń draıveri boldy. Jyl basynan beri ekonomıkaǵa 100 mlrd teńgeden astam qarjy baǵyttalyp, ósim 17 paıyz deńgeıinde baıqaldy», - dedi E. Marjyqpaev Ortalyq kommýnıkatsııalar qyzmetinde.
Onyń aıtýynsha, «Bıznestiń jol kartasy 2025» jáne «Eńbek» baǵdarlamalarynyń aıasynda shaǵyn jáne orta bızneske jan-jaqty qoldaý kórsetiledi, olar boıynsha bıyl ótken jylǵy deńgeıge qaraǵanda 28% ósýimen 8,5 mlrd teńge bólindi.
Jalpy, eseptik kezeńde «Bıznestiń jol kartasy» boıynsha 1,7 mlrd teńgege 500-den astam joba qoldaý tapty.
«Óńirlik bıznes «Qarapaıym zattar ekonomıkasy» baǵdarlamasyna belsendi qatysady. Aǵymdaǵy jyly 9,2 mlrd teńgege 47 joba qarjylandyryldy. Ol 1300 jańa jumys ornyn ashýǵa múmkindik beredi», - dedi ákim.
«Azamattarǵa áleýmettik qoldaý kórsetýge jáne jumyspen qamtylýyna erekshe nazar aýdarylady. Jalpy, túrli baǵdarlamalardy iske asyrý esebinen eńbek naryǵynda shamamen 17 myń, onyń ishinde 10 myńnan astam turaqty jumys orny ashylatyn bolady. Jyl basynan beri áleýmettik tólemdi 20 myńnan astam adam aldy», - dedi ol.
