Aqmola oblysynda ekologııa máselesin sheshý: Jol kartasy boıynsha 30 shara qarastyrylǵan

KÓKShETAÝ. QazAqparat – Aqmola oblysynda ekologııa máselesin sheshý baǵytynda Jol kartasy boıynsha 30 shara qarastyrylǵan. Bul týraly QR Ekologııa jáne tabıǵı resýrstar mınıstri Zýlfııa Súleımenova Aqmola oblysyna jumys sapary barysynda jýrnalıstermen ótken brıfıngte málim etti, dep habarlaıdy QazAqparat tilshisi.

Mınıstrdiń aıtýynsha, jalpy, bıylǵy jyldyń birinshi toqsanynda respýblıka boıynsha lastaýshy zattar shyǵaryndylarynyń naqty kólemi 0,5 mln tonnany qurap, onyń ishinde Aqmola óńirine 36,2 myń tonna tıesili, bul 2022 jyldyń 1 toqsanyndaǵy deńgeıden 2,4 paıyzǵa tómen. Bul kórsetkishke tabıǵatty qorǵaý sharalaryn júzege asyrý arqyly qol jetkizilgen.

«Aqmola oblysy boıynsha ekologııalyq máselelerdi sheshý baǵytynda Jol kartasy boıynsha 30 is-shara kózdelgen. Onyń úsheýi oryndaldy. Oblysta qaldyqtarǵa qatysty álsiz ınfraqurylym, qatty turmystyq qaldyqtar polıgondarynyń normalarǵa sáıkes kelmeýi, ruqsat etilmegen polıgondardyń sanynyń kóp bolýy sııaqty máseleler bar», - dedi mınıstr Zýlfııa Súleımenova.

Mınıstr atap ótkendeı, Aqmola oblysynda oblystyq mańyzy bar 6 qala men aýdan bólek jınaý jáne suryptaýmen qamtylǵan, ıaǵnı, respýblıka boıynsha osyndaı 768 kásiporynnyń 25-i Aqmola oblysyna tıesili.

«Ruqsat etilmegen polıgondardyń kóbeıýi, ásirese elordalyq aımaqta alańdaýshylyq týǵyzady. Kosmomonıtorıng aıasynda bıyl óńirde 830 ruqsat etilmegen qaldyqtardy ornalastyrý orny anyqtalyp, onyń 88 paıyzy joıyldy», - dep túıindedi mınıstr.