Aqmola oblysynda eki medıtsınalyq nysan paıdalanýǵa berildi
Tselınograd aýdanynyń ákimi Bahıdbek Ospanbekovtiń aıtýynsha, aýdanda áleýmettik salany damytýda densaýlyq saqtaý máselesine zor kóńil bólinip otyr. Búgingi tańda aýdandaǵy medıtsınalyq mekemelerde jumys isteıtin dárigerler sany 72 adamdy (jasaqtalý kórsetkishi 72% –), orta medıtsına qyzmetkerleriniń sany 220 adamdy (jasaqtalý kórsetkishi 81%) quraıdy.
«Esepti kezeńdegi demografııalyq kórsetkishterge keletin bolsaq, týý kórsetkishi 30,8 paıyzǵa ósti. Sonymen birge, 2021 jyly – 969 bala dúnıege kelse, bıyl bul kórsetkish 1036 qurady. Náreste ólimi úsh esege jýyq – 157 paıyzǵa tómendedi», - dedi Bahıdbek Ospanbekov jýrnalıstermen ótken brıfıngte.
Aýdan ákimi atap ótkendeı, aýdanda týberkýlez boıynsha syrqattanýshylyq 28 paıyzǵa tómendegen. Qaterli isikterdiń 52 jańa jaǵdaıy anyqtaldy. Mundada syrqattanýshylyq 5,8 paıyzǵa kemigen. Qan aınalymy júıesi aýrýynyń 606 jaǵdaıy anyqtaldy.
«Halyqty sapaly medıtsınalyq kómekpen qamtamasyz etý maqsatynda Densaýlyq saqtaý obektilerin salý kózdelgen. Aýdannyń densaýlyq saqtaý júıesinde 46 medıtsınalyq uıymy tirkelgen. Bıyl aýdanda eki medıtsınalyq mekeme – Sofıevka aýylynda 50 adam qabyldaıtyn dárigerlik ambýlatorııa jáne Qoıandy aýylynda 200 adam qabyldaıtyn otbasylyq densaýlyq ortalyǵy paıdalanýǵa berildi. Qoıandy aýylynda 100 adamǵa arnalǵan alǵashqy medıtsınalyq-sanıtarlyq kómek ortalyǵynyń qurylysy aıaqtalýda», - dep túıindedi ákim.
Aıta ketsek, kókshetaýlyq feldsher ár qyzmetkerdiń kúnine ortasha eseppen 12 shaqyrtýǵa baratynyn aıtqan bolatyn.
