Aqmola oblysynda eki elevator salynýda
KÓKShETAÝ. QazAqparat - Jarqaıyń aýdanynda astyq naýqanyn ysyrapsyz jınaý maqsatynda jańa eki birdeı elevator salynyp, taǵy biri qaıta qurylýda.
Bul týraly Aqmola oblysy ishki saıasat basqarmasy janyndaǵy óńirlik kommýnıkatsııalar qyzmetinen habarlady.
Jarqaıyń aýdanynyń ekonomıkasynda qunarlylyǵy joǵary bıdaı óndirisi negizgi salalardyń biri bolyp tabylatyn aýyl sharýashylyǵy asa zor mańyzǵa ıe.
Jarqaıyńdyq dıqanshylar qaýymy oblysta aldyńǵylardyń biri bolyp astyq naýqanyn tabysty aıaqtap, 600 myń gektar egis alqabynan 12 tsentnerden aınalǵan bitik ónimdi ýaqytynda qambasyna quıyp aldy.
Aýyl sharýashylyǵy damyǵan aýdan úshin egin oraǵynyń aıaqtalýy asa bir mańyzdy oqıǵalardyń biri ekeni jasyryn emes. Astyq orý bastalǵanǵa deıin jemshóp ázirleý de sátimen aıaqtalǵan.
Astyq orýda árıne, birinshi kezekte, kombaın parkiniń tehnıkalyq ázirligin saqadaı-saı etken dıqandar ǵana joǵary nátıjege qol jetkizedi. Astyq orý tehnıkasy bıyl aýdan boıynsha 932 birlikti qurady. Aýyl sharýashylyǵy tehnıkasyn jańartý tıimdiligi men qajettiligi sharýa qojalyqtaryn burynnan alańdatqan.
Osy qaǵıdany berik ustanǵan «Aqtóbe-O», «Agropromtehnıka», «Tuqym Agro», «Torǵaı nan ónimi», «Jer-1», «Dıqan-4» jaýapkershiligi shekteýli seriktestikteri men «Ataı», Temirtaý», Saıan» «Ata-1» sharýa qojalyqtary aldyńǵy qatardan kórindi.
Kúni-túni tynym tappaı árbir ashyq kúndi barynsha paıdalanyp, bitik astyqty shashaý shyǵarmaı jınaǵan dıqannyń eńbegi jandy. Osylaısha Elbasynyń tikeleı eldi azyq-túlikpen qamtamasyz etý jónindegi tapsyrmasyn jarqaıyńdyqtar abyroımen oryndady.
«Árıne egindi jınaýmen qatar ony saqtap, kelesi egin oraǵyna deıin jetkizý de bar ekeni ras. Ol úshin joǵary sapaly tuqym qorlary men suryptary daıyndalyp, par jerler jyrtylǵan. Al astyqtyń saqtalý máselesine endi alańdamasa da bolady. Óıtkeni keler jyldan bastap jarqaıyńdyqtar astyǵyn úsh birdeı elevatorda saqtamaq nıette. Sonymen qatar qoıma jaılary da saqadaı-saı. Ókinishke oraı, ótken jyldary astyqtyń syımaýyna baılanysty shyǵyn mólsheri zor bolǵan. Endi bul másele túbegeıli sheshildi dese de bolady», - deıdi dıqandar.
Bul maqsatta Derjavınsk qalasynda jalpy syıymdylyǵy 60 myń tonnadan astam «Altyn dán KZ» jáne syıymdylyǵy 10,5 myń tonnany quraıtyn «KS Invest» JShS-niń elevatorlary salynýda. Al Tasty-Taldy aýylynda qýaty 120 myń tonnaǵa deıin jetetin «Agro-Nur Azııa» JShS elevatory da qaıta qurylýda.
Bul jobalardy júzege asyrý dıqandardyń elevatorlarǵa qoljetimdiligin qamtamasyz etip, astyq tapsyrýda adal básekelestikti quratyny aıqyn.
