Aqmola oblysynda eki bala sýǵa batyp ketti
KÓKShETAÝ. QazAqparat - Aqmola oblysynda kámelet jasyna tolmaǵan eki bala sýǵa batyp ketti, dep habarlaıdy QazAqparat tilshisi oblystyq TJD baspasóz qyzmetine silteme jasap.
Vedomstvonyń málimetinshe, bıylǵy jylǵy mamyrdyń 25-de saǵat 17:23 shamasynda Arshaly aýdany ÓKM kezekshisinen №42 razezd stantsııasynyń janynda belgisiz jaǵdaılarda kámeletke tolmaǵan eki balanyń sýǵa batyp ketkeni týraly telefon habarlamasy túsken.
«Іzdestirý jumystaryna Arshaly aýdandyq TJB jeke quramynan eki adam jáne 1 tehnıka, Arshaly aýdandyq PB jeke quramynan bes adam jáne 1 tehnıka, Nur-Sultan qalasy TJD jeke quramynan tórt adam jáne 1 tehnıka jumyldyryldy», - dedi vedomstvodan.
Aıta ketsek, oqıǵa ornyna kelgen boıda №42 razezd stantsııasynan 200 metr qashyqtyqta sýǵa batyp ketken 2013 jyly týǵan eki balanyń 1-synyp oqýshylary ekeni anyqtaldy.
«Mán-jaılardy anyqtaý, sondaı-aq kýágerlerden suraý kezinde ata-anasynyń suranysynsyz úsh bala úıden shyǵyp, joǵaryda kórsetilgen ýchaskede shomylýǵa barǵany belgili boldy. Shamamen 16:30 kishi uly úıge júgirip kelip, ákesine shomylyp júrgen aǵalary kómek suraǵanyn aıtty. 16:55 ákesi bir balanyń denesin sýdan alyp shyqty. Keıin saǵat 18:34-te Nur-Sultan qalasynyń TJD qyzmetkerleri sýǵa batqan ekinshi balanyń denesin alyp shyqty. Sot medıtsınalyq saraptama taǵaıyndaldy», - dep tolyqtyrdy vedomstvodan.
