Aqmola oblysynda eki adamnyń ómirin qıǵan qanisher tuzaqtaldy
ASTANA. 18 qazan. QazAqparat /Jasulan Amanbaıuly/ - Aqmola oblysynda qanquıly oqıǵa oryn aldy, Qarabulaq aýylynda qanisher eki adamdy baltamen shaýyp óltirip, taǵy bireýin aýyr jaralaǵan.
Aqmola oblystyq ІІD baspasóz qyzmetiniń aqparatyna sáıkes, atalmysh oqıǵa 16 qazan kúni oryn alǵan. Sol kúni-aq Aqmola oblysynyń Stepnogor aýdandyq ІІD-niń kezekshilik pýltine Qarabulaq aýylyndaǵy úılerdiń birinen zorlyq-zombylyq belgileri bar eki máıit tabylǵandyǵy jóninde sýyt habar kelip túsken. Tergeý amaldary barysynda Qarabulaq aýylyna ýaqytsha kelgen 1979 jyly týǵan, buryn birneshe ret sottalǵan azamat qolǵa túsedi. Jeke tulǵasyn anyqtaý barysynda oǵan 20 qyrkúıek kúni ózge adamnyń múlkin urlady degen kúdikpen izdeý salynǵandyǵy anyqtalady.
Tergeý kezinde anyqtalǵanyndaı, kúdikti sol kúni Qarabulaq aýylynda júrip, úılerdiń birine kirip, uıyqtap jatqan 1960 jyly týǵan sol úıdiń ıesine baltamen birneshe soqqy jasaǵan. Odan keıin kórshi bólmede jatqan onyń 1996 jyly týǵan balasynyń basynan baltamen uryp, bala ómirin qyrshynynan qııady. Sodan soń ol kelesi bólmege baryp, 1991 jyly týǵan balasyna birneshe soqqy siltep, kózin qurtpaq bolady, alaıda sońǵysy qashyp úlgergen.
Qazirgi ýaqytta 20 jasar bozbala ashyq bas súıek-mı jaraqaty, moıynnyń kesilgen jarasy, jelke tusynyń kesilgen jarasy dıagnozymen qalalyq aýrýhananyń jansaqtaý bóliminde jatyr.
