Aqmola oblysynda eki adamnyń máıiti tabyldy
KÓKShETAÝ. QazAqparat - Aqmola oblysynda eki adamnyń máıiti tabyldy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinde, onyń biri – Şýchınsk qalasyndaǵy aıaldamalardyń birinen tabylǵandyǵy aıtylady. 55 jas shamasyndaǵy er adamnyń boıynda kúsh qoldanýdyń belgisi baıqalmaǵan. Sot saraptamasy onyń júrek talmasynan qaıtys bolǵandyǵy anyqtalyp otyr.
Al, ekinshi adam Stepnogorsk qalasynda qatyp qalǵan kúıinde tabyldy. Ekeýi de turǵylyqty mekenjaıy joq tulǵalar.
Óńirde kúnniń kúrt sýytýyna baılanysty tártip saqshylary qańǵybastardyń júretin jerlerin tekserip, qabyldaý, úılestirý oryndaryna jetkizýde.
«Búgingi kúni sottyń sheshimimen Kókshetaý qalalyq PB janyndaǵy qabyldaý úılestirý ornyna turǵylyqty mekenjaıy joq 17 adam jetkizilgen. Al, jyl basynan beri barlyǵy osyndaı 212 qańǵybas ornalastyryldy. Polıtsııa qyzmetkerleri olardyń aty – jónin anyqtap, iz-túzsiz joǵalǵandar tiziminde turǵan turmaǵanyn, qylmystarǵa qatysy bar – joǵyn anyqtaýda», - deıdi vedomstvo ókilderi.
Vedomstvonyń deregi boıynsha, jyl basynan beri polıtsııa jáne beıimdeý ortalyǵynyń qyzmetkerleri birlesip «Áleýmettik patrýl» mobıldi qyzmetin ashqan. Ondaǵy mamandar aýa raıynyń jaısyzdyǵyna qaramastan qańǵybastardy izdestirýde. Olardyń belsendi jumysynyń arqasynda ortalyqqa áleýmettik kómekke muqtaj 159 adam jetkizilgen.
