Aqmola oblysynda egin oraǵynyń qorytyndysy men ekologııalyq ahýal talqylandy
KÓKShETAÝ. QazAqparat - Aqmola oblysynyń basshysy Ermek Marjyqpaevtyń tóraǵalyǵymen ótken ákimdik májilisinde kúzgi egin oraǵy naýqanynyń qorytyndylary men ekologııalyq ahýal talqylandy, dep habarlaıdy QazAqparat tilshisi.
Májiliste baıandama jasaǵan Aqmola oblystyq aýyl sharýashylyǵy basqarmasy basshysynyń mindetin atqarýshy Dımash Talasbaevtyń aıtýynsha, bıylǵy egin oraǵy naýqany asa kúrdeli jaǵdaıda ótti. Aýa raıynyń qolaısyzdyqtaryna qaramastan, oblys dıqandary dándi-daqyldardyń barlyq túrinen jaqsy ónim aldy.
Oblys sharýashylyqtary bıyl 4,3 mıllıon gektar alqapqa dándi jáne burshaq daqyldaryn seýip, qoımaǵa 5,1 mıllıon tonna astyq quıyp aldy. Ár gektardan túsim 11,7 tsentnerden aınalyp otyr. Jınalǵan astyqtyń jartysynan kóbi 3-sanatty, ıaǵnı egin sapasy da kóńilden shyǵatyndaı dárejede. Astyqty qabyldap, saqtaıtyn oryndardy ýaqytynda durys ázirleýdiń arqasynda, bul máselede esh qıyndyq bolǵan joq.
Qazirgi kúnge deıin sharýashylyqtar 218 myń gektar alqaptyń maıly daqyldaryn jınady. Bul – jalpy osy daqyldar egistigi alqabynyń 85,2 paıyzy. 156,7 myń tonna maıly daqyl jınalyp, gektar túsimi 7,2 tsentnerdi qurady. Sonymen birge, 17,4 myń gektar alqaptan 278 myń tonna kartop, 3,8 myń gektardan 57 myń tonna kókónis jınalyp alyndy.
Aımaq basshysy barlyq aýdan, qala ákimderine oblystyq aýyl sharýashylyǵy basqarmasymen birlese otyryp, jınalǵan astyqty saqtaý jáne nan baǵasyn turaqty ustap otyrý úshin «Azyq-túlik korporatsııasy» Ulttyq kompanııasy» AQ-ǵa astyqty tapsyrý arqyly azyq-túlik qoryn jasaý máselesin sheshýdi júktedi. Sondaı-aq, 10 qarashadan keshiktirmeı maıly daqyldardy túgel jınap alýǵa tapsyrma berildi.
Budan bólek, májilis barysynda Aqmola oblysy boıynsha Ekologııa departamentiniń basshysy Ánýar Nurseıitov ózekti máselelerdiń biri – qatty turmystyq qaldyqtardy saqtaıtyn polıgondardy zańdastyrý jaıynda aqparat berdi. Qazirgi kúni oblys aýmaǵynda qatty turmystyq qaldyqtarǵa arnalǵan 130 qoqys tógetin oryn men polıgon bolsa, solardyń 25-i ǵana zańdastyrylǵan. Ǵaryshtyq monıtorıng qorytyndysyna saı, búgingi kúni 1576 zańsyz qoqys tógetin oryn anyqtalǵan. Bunyń qorshaǵan ortaǵa úlken zalalyn tıgizetini belgili.
Oblys basshysy bul máselege qatysty Tabıǵat rýsýrstary jáne tabıǵatty paıdalanýdy retteý basqarmasy men barlyq aýdan, qala ákimderine qatty turmystyq qaldyqtar polıgondaryn zańdastyrýǵa, mundaı polıgondary joq selolyq okrýgter aýmaǵynan ýaqytsha qoqys tógetin oryndar jasaý boıynsha tıisti sharalar qabyldaýdy júktedi.
Sonymen birge, energetıka jáne turǵyn úı-kommýnaldyq sharýashylyǵy basqarmasy men aýdan, qala ákimderine qatty turmystyq qaldyqtar saqtaıtyn polıgondar salý, óńirlerde turmystyq qaldyqtar shıkizattaryn qabyldaıtyn qosymsha pýnktter ashý jáne konteıner turatyn alańdardy talaptarǵa saı abattandyrý, kommýnaldyq qaldyqtardy túrine qaraı bólip qabyldaý sııaqty sharalardy júzege asyrý jóninde naqty tapsyrmalar berildi.
