Aqmola oblysynda egin oraǵy aıaqtaldy
KÓKShETAÝ. QazAqparat - Aqmola oblysynda barlyǵy 4,4 mıllıon gektar egis alqabynda kúzgi jıyn-terin jumystary tolyq aıaqtaldy, dep habarlaıdy QazAqparat tilshisi oblystyq aýyl sharýashylyǵy basqarmasyna silteme jasap.
Aýyl sharýashylyǵy basqarmasynyń málimetinshe, oblys dıqandary 5,2 mıllıon tonna astyq jınady. Bul ótken jyldyń kórsetkishimen salystyrǵanda 17 paıyzǵa kóp. Oblys boıynsha ár gektardan ortasha 11,2 tsentnerden astyq alyndy.
«Bıylǵy jyl eginniń pisip-jetilýi úshin qolaısyz boldy. Osyǵan qaramastan dıqandar agrotehnologııalyq sharalar men egin oraǵy jumystaryn joǵary deńgeıde uıymdastyrý arqyly mol ónim alyp otyr. Bıylǵy kórsetkish byltyrǵymen salystyrǵanda anaǵurlym joǵary, bıdaıdyń 95 paıyzy 3-synypqa jatady. Budan bólek, astyq qabyldaý kásiporyndaryna túsken 70 paıyz bıdaıdyń jelimtegi 30 paıyzdan asady. 2019 jyly bul kórsetkish nebári 12 paıyzdy qurady», - dedi oblystyq aýyl sharýashylyǵy basqarmasynyń basshysy Dımash Talasbaev.
Bıylǵy egin oraǵy kezinde jınalǵan astyq jalpy syıymdylǵy 4,2 mıllıon gektar bolatyn 65 astyq qabyldaý oryndaryna tasymaldanyp jatyr. Sondaı-aq, keler jyldyń egisi úshin 6,6 mıllıon tonnadan astam tuqym quıyldy.
