Aqmola oblysynda ETsQ paıdalaný arqyly bıýdjet qarajaty urlanǵan
Kezdesý barysynda qatysýshylarǵa qylmystyq quqyq buzýshylyq jasaýǵa jáne basqa da zań buzýshylyqtarǵa yqpal etetin jaǵdaılardy joıý týraly usynystardy túsindirý boıynsha málimet (QR QPK 200-baby sheńberinde) berildi.
«Máselen, sotqa deıingi is júrgizý barysynda Býrabaı aýdanynyń qurylys bóliminiń bas mamany onyń turaqty paıdalanýyndaǵy basshynyń elektrondyq-tsıfrlyq qoltańbasyn paıdalaný arqyly 2 526 863 teńge somasynda bıýdjet qarajatyn jymqyrǵany anyqtaldy, onyń qyzmetkerlerdiń karta shottaryna óz jalaqysy retinde negizsiz aqsha qarajatyn aýdarǵany sot-ekonomıkalyq saraptamanyń qorytyndysymen rastaldy. Qylmystyq qýdalaý organy qabyldaǵan túpkilikti sharalardyń nátıjesinde bul qarajat memleket kirisine óteldi», - deıdi vedomstvodan.
Kezdesýde atalǵan zań buzýshylyqqa aýdannyń tıisti memlekettik organdary basshylarynyń tarapynan baqylaýdyń bolmaýynan, sondaı-aq qurylys bóliminiń laýazymdy tulǵalarynyń tikeleı mindetterin tıisinshe oryndamaýy saldarynan jol berilgeni aıtyldy.
Osy rette, Sybaılas jemqorlyqqa qarsy qyzmet basshylyǵy Býrabaı aýdanynyń qarjy bólimi tarapynan eńbekaqy tóleý qoryndaǵy bıýdjet qarajatyn jumsaýdy josparlaýǵa baqylaýdy júzege asyrý tártibin ázirleý túsindirdi. Sondaı-aq ákimdiktiń derbes bólim men bólimsheleri basshylary úshin kompıýter saýaty jáne ETsQ paıdalanýdy oqytý semınaryn ótkizý qajettigi aıtyldy.
«Memlekettik aqshany tıimsiz paıdalaný men urlaýdyń kez kelgen alǵysharty men jaǵdaıynyń jolyn kesýdi taǵy da atap ótkim keledi. Sondyqtan da qatysýshylardy adaldyqqa, satylmaýshylyqqa, azamattar men memlekettiń múddelerine qyzmet etýge, sondaı - aq sybaılas jemqorlyqqa nóldik tózimdilikti qalyptastyrýǵa shaqyramyn», - dep atap ótti Rústem Tanabaev.
