Aqmola oblysynda dúkenshi men júrgizýshiden koronavırýs tabyldy
Vedomstvonyń málimetinshe, bul joly aldymen Býrabaı kentiniń turǵyny 1961 jylǵy áıelden profılaktıkalyq maqsatta zertteý kezinde anyqtaldy. Ol tamaqtyń jybyrlaýy, jótelý jáne dene qyzýynyń 37,2 gradýsqa kóterilýine shaǵymdanǵan.
Budan bólek, Stepnogor qalasynda koronvırýs ınfektsııasyn juqtyrýdyń alǵashqy jaǵdaıy tirkeldi. Qaýipti ınfektsııa aýrýhanaǵa júgingen 1996 jylǵy áıelden skrınıng kezinde tabyldy.
Sondaı-aq, Egindikól aýdanynda 1982 jylǵy dúken satýshysynan anyqtaldy. Ol atalmysh aýrý belgisimen aýrýhanaǵa ózi júgingen.
Sonymen qatar, Kókshetaý qalasynyń turǵyny 1977 jylǵy er adam koronvırýs juqtyrdy. Ol benzın tasymaldaıtyn kóliktiń júrgizýshisi, oblys aýmaǵynda benzın tasymaldaýmen aınalysyp kelgen.
Naýqas Aqmola oblystyq týberkýlezge qarsy dıspanseriniń juqpaly aýrýlar bólimshesine jatqyzyldy.
Ol osyǵan deıin «ókpesiniń ekijaqty vırýstyq-bakterıologııalyq qabynýy, asqynyń aýry deńgeıi» dıagnozymen Aqmola oblystyq kópbeıindi aýrýhanasynyń pýlmanolog bólimshesine jatqyzylǵan bolatyn.
«Naýqastarǵa bekitilgen klınıkalyq hattamaǵa sáıkes medıtsınalyq kómek kórsetiledi. Úı oshaǵynda epıdemııaǵa qarsy dezınfektsııalaý, sondaı-aq, naýqastarmen baılanysty bolǵan adamdary anyqtaý boıynsha sanıtarlyq-epıdemıologııalyq sharalar júrgiziledi», deıdi Aqmola oblystyq taýarlar jáne kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmetindegiler.
Aıta keteıik, Aqmola oblysynda osymen COVID-19 juqtyrǵandardyń sany 190 adam boldy. Al, jazylyp shyqqandar 141 adamǵa jetip otyr.
Sondaı-aq, oblystyq densaýlyq saqtaý basqarmasynyń málimetinshe, óńirde aýrý belgileri bilinbeıtin koronavırýs ınfektsııasyn juqtyrǵan naýqastardyń sany artýda.
Osyndaı sımptomsyz 44 adam úı karantınine alyndy. Onyń ishinde sońǵy táýlikte Sandyqtaý aýdanynda 3 adamnan – eki eresek adam men 2014 jylǵy baladan anyqtaldy.