Aqmola oblysynda dýaldy oqytý júıesi qalaı jumys istep jatyr

KÓKShETAÝ. QazAqparat - Aqmola oblysynda tehnıkalyq jáne kásiptik bilim berý júıesi tıimdi damýda. Óńir kolledjderi eńbek naryǵynda suranysqa ıe mamandyqtar boıynsha kásibı-tehnıkalyq kadrlardy daıarlaýda, dep habarlaıdy QazAqparat tilshisi.

Oblystyq ishki saıasat basqarmasynyń málimetinshe, tehnıkalyq jáne kásiptik bilim berýde dýaldy oqytý júıesi de aıtarlyqtaı úles qosýda. Bul format 440-tan astam kásiporynnyń qatysýymen 29 kolledjde engizilgen. Memlekettik tapsyrys boıynsha bilim alatyn jáne dýaldi oqytýmen qamtylǵan tehnıkalyq jáne kásiptik bilim berýdegi stýdentterdiń úlesi memlekettik tapsyrys boıynsha bilim alýshylardyń jalpy sanynan 3947 adamdy quraıdy.

«Ótken jyldan bastap jańartylǵan Memlekettik bilim berý standartyna sáıkes bilim berý baǵdarlamalaryn kolledjder jumys berýshilerdiń kelisimi boıynsha memlekettik jalpyǵa mindetti bilimniń standarty, kásiptik standarttar men WorldSkills standarttarynyń talaptary negizinde derbes ázirleıdi. Bul jańashyldyqtar akademııalyq derbestik aıasynda kolledjderdiń oqý jumys josparlaryn eńbek naryǵyna odan ári baǵyttaýǵa múmkindik berdi», - dep atap ótti bilim basqarmasynan.

Sońǵy eki jyl ishinde 11 kolledj qatysatyn «Jas maman» jobasy boıynsha aıtarlyqtaı bıýdjet qarajatyn bólý sapaly bilim alýǵa qoljetimdilikti qamtamasyz etýge múmkindik beredi. Eńbek naryǵynda suranysqa ıe, tehnıkalyq 19 mamandyq boıynsha bilikti kadrlardy daıarlaý úshin jabdyqtar satyp alyndy. Aýyldyq, shaǵyn jınaqty kolledjderdi qoldaý máselesi erekshe nazar aýdarýdy talap etedi. Shaǵyn kolledjderge kómek kórsetý úshin olarǵa oblystyń 13 jetekshi kolledji – «Jas maman» jobasynyń qatysýshylary jáne pedagogıkalyq kolledjder bekitilgen. Bıyl eńbek naryǵyn bilikti kadrlarmen qamtamasyz etý aıasynda «Altyn Almas AK» AQ jáne «Eýropalyq podshıpnık korporatsııasy» AQ sııaqty óńirdiń iri kásiporyndaryn qamqorlyqqa alý josparlanǵan.

«Sonymen qatar, qazirgi ýaqytta óńirlik kásipkerler palatasymen, sondaı - aq kásipkerlik jáne týrızm, aýyl sharýashylyǵy jáne jer qatynastary, qurylys basqarmalarymen birlesip tıisti salanyń iri kásiporyndaryn qamqorlyqqa tartý máselesi pysyqtalýda», - dep tolyqtyrdy vedomstvodan.

Aıta ketsek, oblys kolledjderi WorldSkills halyqaralyq qozǵalysyna belsendi qatysyp keledi. WorldSkills - 2021 Ulttyq chempıonatynyń qorytyndysy boıynsha Aqmola oblysynyń komandasy 8 altyn, 5 kúmis, 5 qola medal jáne 14 sheberlik medal ıelendi.