Aqmola oblysynda daýyldan taǵy bir adam qaza boldy
KÓKShETAÝ. QazAqparat – 7 sáýir kúni Aqmola oblysynda bolǵan daýyl saldarynan taǵy bir adam kóz jumdy. Bul týraly Kókshetaý qalasynyń ákimi Amangeldi Smaıylov onlaın-brıfıng barysynda aıtty, dep habarlaıdy QazAqparat tilshisi.
Qala ákiminiń aıtýynsha, daýyldan túrli dene jaraqatyn alǵan 17 adam Aqmola oblystyq kópbeıindi aýrhanasyna júgingen. Onyń ishinde 24 jastaǵy er adam bassúıek-mı jaraqatynan kóz jumdy.
Oblystyq Densaýlyq saqtaý basqarmasy baspasóz qyzmetiniń málimetinshe, er adam 7 sáýir, keshki saǵat 19:06-da Aqmola oblystyq kópbeıindi aýrýhanasyna «epıdýraldyq qan quıylý (travmadan), jabyq bassúıek-mı jaraqaty, bassúıektiń negizgi bóligine ótken jelke súıeginiń synýy, sol jaq jelke tusynyń jáne sol jaq qaraǵusynyń epıdýraldy gematomasy, bas mıynyń aýyr deńgeıdegi jaraqaty» dıagnozymen jetkizilgen.
«Keshki saǵat 22:00-de bas súıegine trepanatsııa jasaldy. Sol jaq epıdýraldy gematoma alyndy. Otadan keıin jaǵdaıy óte aýyr boldy. Ókpege jasandy jeldetý apparaty qosyldy. 8 sáýirde bıologııalyq ólimi tirkeldi. Sebebi - mıdyń isinýi», - dedi Densaýlyq saqtaý basqarmasynan.
Eske salaıyq, 7 sáýirde oırandaǵan daýyldan Kókshetaý jáne Stepnogor qalalarynda, sondaı-aq 12 aýdanda mektep, aýrýhana, balabaqsha tárizdi 43 áleýmettik nysan, 70 turǵyn úı jáne 6 kommertsııalyq nysannyń shatyry jelmen ushqan bolatyn. Al Býrabaı aýdanynyń Urymqaı aýylynda «Mashına saraıy» JShS shatyry ushyp, 40 jastaǵy er adam kóz jumǵan edi.
