Aqmola oblysynda daýyl elektr baǵandaryn qulatyp ketti
KÓKShETAÝ. QazAqparat – Aqmola oblysynyń Býrabaı aýdanynda tabıǵattyń tosyn minezinen zaqym kelgen elektrmen qamtý jelileri qalpyna keltirilip jatyr, dep habarlaıdy QazAqparat tilshisi.
Keshe Býrabaı aýdanynda daýyl turyp, jańbyr quıdy, burshaq jaýdy. Julqyna soqqan jel Şýchınsk qalasynyń meshitiniń aldyndaǵy elektr baǵanasyna zaqym keltirdi.
«31 shilde kúni soqqan daýyl saldarynan Şýchınsk qalasynda elektrmen qamtý jelilerine zaqym keldi. Soǵan baılanysty Býrabaı jáne Birjan sal aýdandarynyń birneshe eldi mekeni jaryqsyz qaldy. Olardy qalpyna keltirip jatyr, qazir Şýchınskide elektrmen qamtý symdary qalpyna keltirildi. Jaryqsyz qalǵan aýyldarǵa da elektr beriledi», - deıdi Býrabaı aýdany ákimi apparatynyń TJ jónindegi mamany Ǵalym Hasenov.
Onyń aıtýynsha, qalpyna keltirý jumystaryna 25 adam jumyldyrylǵan.
Býrabaı aýdany ákimdiginiń baspasóz qyzmetiniń málimdeýinshe, aýdannyń Mádenıet, Vorobevka aýyldary, «Şýchınskıı» shıpajaıy, sondaı-aq kórshi otyrǵan Birjan sal aýdanynyń Jańaýyl, Ándiqoja batyr, Tasshalqar, Júkeı, Úlgi aýyldary jaryqsyz qalǵan.
Daýyldan zaqym kelgen aýyldarda jedel járdem men polıtsııa qyzmetkerleri, qutqarýshylar kezekshilik atqarýda.
Avtor: Oksana Matasova
