Aqmola oblysynda daryndy balalarǵa arnalǵan jańa mektep-ınternaty ashyldy
Bilim ordasynda 7-11 synyp oqýshylary qazaq jáne orys tilderinde bilim alatyn bolady, dep habarlaıdy QazAqparat tilshisi oblystyq bilim basqarmasynyń baspasóz qyzmetine silteme jasap.
Mekteptiń ashylý saltanatyna Aqmola oblysy ákiminiń orynbasary Aına Mysyrálimova, Aqmola oblysy bilim basqarmasy basshysynyń orynbasary Botakóz Dúısenova jáne «Bilim-ınnovatsııa» halyqaralyq qoǵamdyq qorynyń vıtse-prezıdenti Erjan Áýbákirov qatysty.
«ІT Bilim-ınnovatsııa» lıtseıinde sapaly bilim alý úshin zamanaýı materıaldyq-tehnıkalyq bazasy bar mamandandyrylǵan jabdyqtarmen jabdyqtalǵan hımııa, bıologııa jáne fızıka zerthanalary, ІT kabınetteri, robototehnıka kabınetteri, al sabaqtan tys jumystar úshin dombyra jáne shahmat synyby, basseın bar.
Bilim ordasynda ınformatıka men aqparattyq-kommýnıkatsııalyq tehnologııalardy paıdalaný arqyly oqýshylardyń jeke, shyǵarmashylyq jáne zertteý qabiletterin damytý boıynsha jumystar júrgiziledi .
«7-synypqa túsý kezinde balalar til úırenýge beıimdiledi, 8-synypta balalar ІT baǵyty, robototehnıka, baǵdarlamalaý jáne 3D modeldeý boıynsha sabaqtardan ótedi. Ári qaraı, oqýshy sabaqtardyń ishinen ózi úshin bir naqty baǵytty tańdaıdy. Al 10-11 synyptarda tańdalǵan daıyndyq baǵyty boıynsha jobalarmen jumys isteıdi jáne ІT-baǵytty tereń oqyp, zertteý isimen aınalysady», -dedi vedomstvonyń baspasóz qyzmetindegiler.
Bolashaqta, mektep oqýshylarynyń aldynda zamanaýı tehnologııalardy oqytý, jaqyn jáne alys shetelderdiń jetekshi IT-ýnıversıtetteri men kompanııalarynda tájirıbeler men taǵylymdamalardan ótý, eń ozyq baǵdarlamalar men tehnologııalarmen jumys isteý úshin keń múmkindikter ashý qarastyrylǵan.
