Aqmola oblysynda dárigerler shala týǵan eki náresteni aman alyp qaldy

KÓKShETAÝ. QazAqparat - Aqmola oblysynda dárigerlerdiń arqasynda shala týǵan eki náreste aman qaldy, dep habarlaıdy QazAqparat tilshisi.

Oblystyq densaýlyq saqtaý basqarmasy baspasóz qyzmetiniń málimetinshe, Nur-Sultan qalasyndaǵy Aqmola oblystyq №2 kópbeıindi aýrýhanasynyń akýsherlik bólimshesine shuǵyl túrde Shortandy aýdanynan eki júkti áıel túsken. Olardyń ekeýin de shuǵyl bosandyrý qajet bolǵan.

«Áıelderdiń bireýiniń júktiligi 29 apta boldy. Onda aýyr platsentarly buzylýlar, qaıtalama sýsyzdyq túrinde asqynýlar anyqtaldy. Bul qursaqishilik damýdyń kesheýildeýine ákeldi. Sondaı-aq áıelde aýyr arterııalyq gıpertenzııa boldy. Al, ekinshi áıeldiń júktiligi 24 apta 6 táýlikti qurady. Onda amnıotıkalyq suıyqtyqtyń merziminen buryn tógilýi paıda boldy, eki kúnnen astam sýsyz kezeńde horıoamnıonıt damydy. Sol sebepti, dárigerler eki áıeldi de merziminen buryn bosandyrý qajet dep tapty. Olar salmaǵy 700 jáne 721 gramm bolatyn eki náresteni merziminen buryn dúnıege ákeldi», - dedi vedomstvodan.

Densaýlyq saqtaý basqarmasy baspasóz qyzmeti atap ótkendeı, shala týǵan nárestelerdiń esimderin ata-analary Asylym jáne Batyrhan dep qoıdy. Náresteler akýsher dárigerler men medbıkelerdiń kásibı sheberligi jáne qamqorlyǵynyń arqasynda dúnıe esigin ashqan kúnnen keıin 96 jáne 64 táýlik ótken soń 2000 gramnan astam salmaqqa jetip, úılerine shyǵaryldy.

«Merziminen buryn týǵan balalardy qutqarý tipti álemdik tájirıbede sırek kezdesetin jaǵdaı. Alaıda bizdiń dárigerler bul synaqtan súrinbeı ótti», - dep tolyqtyrdy vedomstvodan.

Osyǵan deıin Aqmola oblysynyń 5 aýdanynda sý tasqyny qaýpi joıylǵanyn habarlaǵan edik.