Aqmola oblysynda dáriger tapshylyǵy qalaı sheshilip jatyr
Oblystyq densaýlyq saqtaý basqarmasynyń málimetinshe, qazir densaýlyq saqtaý júıesinde 6 984 medıtsına qyzmetkeri, onyń ishinde 1 483 dáriger jáne 5 501 orta medıtsına qyzmetkeri jumys isteıdi.
«Dárigerlik kadrlar tapshylyǵyn tómendetýge baǵyttalǵan jumys salany damytýdyń negizgi vektory bolyp tabylady. Máselen, keıingi eki jylda bizde dárigerlerdiń tapshylyǵy 1,5 esege, ıaǵnı 382-den 244-ke deıin (qalalyq jerlerde – 156, aýyldyq jerlerde – 88) tómendedi. 159 dáriger, onyń ishinde 55 dáriger aýyldyq jerlerge tartyldy», - delingen vedomstvonyń resmı málimetinde.
Vedomstvonyń keltirgen derekteri boıynsha, oblystyq bıýdjet qarajaty esebinen aýyldyq jerge barǵan 35 jas dárigerge 1 mıllıon teńge kóleminde kóterme aqy tólendi. 101 dáriger turǵyn úımen qamtamasyz etilgen, onyń 51-i ákimdikter esebinen, 50-i medıtsınalyq uıymdar esebinen. 143 medıtsına qyzmetkeri jalpy 589,3 mıllıon teńge kóleminde turǵyn úı satyp alýǵa nesıe aldy (1 500 aılyq eseptik kórsetkishke deıin). «Dıplommen aýylǵa» jobasy boıynsha 74 mıllıon teńgege 259 medıtsına qyzmetkerine kóterme aqy berildi.
Dárigerlik kadrlardyń tapshylyǵyn azaıtý úshin jyl saıyn rezıdentýrada oqýǵa 35 grant, «Jalpy medıtsına» mamandyǵy boıynsha oqýǵa 50 grant bólinedi. Orta býyn medıtsına qyzmetkerlerine jergilikti bıýdjet esebinen 190 grant, respýblıkalyq bıýdjettiń 20 granty, «Eńbek» nátıjeli jumyspen qamtýdy jáne jappaı kásipkerlikti damytý baǵdarlamasy boıynsha 50 grant jáne Aqmola oblysyndaǵy aýdan ákiminiń 1 granty bólinedi.
Sonymen qatar, oblys ortalyǵynda medıtsına qyzmetkerlerine arnalǵan 40 páterlik úı salyndy. Egindikól aýdanynda 8 oryndyq jataqhanaǵa kúrdeli jóndeý júrgizildi. Atbasar aýdanynda bos turǵan ǵımarattardyń biri 30 oryndyq jataqhana retinde qaıta jóndeldi. Al, Jaqsy aýdanynda 8 páterli turǵyn úı salyndy.
Aıta ketsek, Aqmola turǵyndary segiz aıda jedel járdemge 172 myń qońyraý shalǵan.
