Aqmola oblysynda dári – dármekpen qamtamasyz etý jumystary qatań baqylaýda
KÓKShETAÝ. QazAqparat – Aqmola oblysy ambýlatorlyq jáne stantsıonarlyq dári – dármekpen qamtamasyz etý jáne koronavırýs ınfektsııasymen kúresý úshin qajetti preparattarmen qamtamasyz etildi, dep habarlaıdy QazAqparat tilshisi oblystyq ishki saıasat basqarmasyna silteme jasap.
Oblystyq densaýlyq saqtaý basqarmasynyń málimetinshe, búgingi tańda óńirdegi medıtsınalyq uıymdarda qajetti dári – dármek jetkilikti.
«Jergilikti bıýdjet esebinen koronavırýs ınfektsııasynyń ekinshi tolqynyna daıyndyq maqsatynda dári – dármektiń eki aılyq qory jasaldy. Qazirgi tańda 80 mıllıon teńgege kelisimshart jasaldy. Stantsıonarlyq qamtamasyz etý sheńberinde 568 túrli dárilik zattar jetkizildi, qosymsha 85 túrli dári túsirilýde», - deıdi vedomstvodan.
Sonymen birge, koronavırýsti emdeý úshin qosymsha 80,2 mıllıon teńge bólindi. Medıtsına uıymdary koronavırýsty emdeý úshin dáriniń jańa 5 túrine tapsyrys berdi. Onyń ishinde 85 mıllıon teńgeniń dárisi jetkizildi. Qalǵany 68 mıllıon teńgeniń dári-dármegi. Jalpy, 50 myń adamdy dári-dármekpen qamtý josparlanǵan. «Kókshe» áleýmettik kásiperlik korporatsııasynda qurylǵan turaqtandyrý qory sheńberinde dári-dármek satyp alynýda.
«Turaqty júrgizilip turǵan monıtorıng dárihanalarda dáriler men medıtsınalyq ónimderdiń shepti bólshek baǵasy kóterilmegeni anyqtaldy. Bul óńirdiń dárilik preparattarmen jetkilikti qamtamasyz etilgenin kórsetedi», - dep tolyqtyrdy vedomstvodan.
Aıtalyq, oblystyń dárihanalar qoımasynda 260 myń maska, 4500 medıtsınınalyq bas kıim, 5816 jup nıtrıldi lateks saýsaqqaby bar.
