Aqmola oblysynda dán sebý jumystary aıaqtaldy

KÓKShETAÝ. QazAqparat - Aqmola oblysynda tuqym sebý jumystary aıaqtaldy. Bıyl óńirde egistik alqaptarynyń jalpy aýmaǵy 27,3 myń gektarǵa ulǵaıyp, 5,2 mıllıon gektardy qurady. Bul týraly jýrnalıstermen ótken brıfıngide oblystyq Aýyl sharýashylyǵy basqarmasynyń basshysy Kenesh Álimjanov málim etti, dep habarlaıdy QazAqparat tilshisi.

Basqarma basshysynyń aıtýynsha, joǵary deńgeıdegi uıymdastyrýshylyqtyń, sharýalardyń jaýapkershiligi men qazirgi zamanǵy ozyq tehnologııany qoldanýdyń arqasynda, sondaı-aq qolaıly klımattyq jaǵdaılar naýqandy der kezinde bastap, qysqa merzimniń ishinde sátti aıaqtaýǵa múmkindik berdi.

«Bıylǵy jyly oblys boıynsha barlyǵy 5,2 mıllıon gektar alqapqa dán sebildi. Onyń 4,7 mıllıon gektary dándi, 355 myń gektary maıly daqyldar. Mańyzdy naýqanǵa barlyǵy 15 myńnan astam traktor, 16,6 myń sepki jáne ónimdiligi joǵary 1,5 myńǵa jýyq egistik keshen jumyldyryldy. Óńirde aýyl sharýashylyǵy tehnıkalaryn jańartýǵa da basty kóńil bólinip keledi. Jyl basynan sharýalar jalpy quny 23,7 mıllıard teńgege 557 tehnıka satyp aldy», - dedi Kenesh Álimjanov.

Basqarma basshysy atap ótkendeı, jyl saıyn óńirge Úkimet tarapynan arzandatylǵan baǵamen janar-jaǵar maı bólinip keledi. Bıyl osy baǵytta lıtri 222 teńgeden 74,3 myń tonna dızel otyny bólindi.

Aıta ketsek, budan buryn Aqmola oblysynda bıyl 5,2 mıllıon gektarǵa dán sebiletinin jazǵan edik.