Aqmola oblysynda COVID-19-dan keıin ońaltý qalaı júrip jatyr

KÓKShETAÝ. QazAqparat – Aqmola oblysynda ótken jyldyń naýryz aıynan bastap oblystyq ftızıopýlmonologııa ortalyǵynyń janynan koronavırýs ınfektsııasynan jazylyp shyqqan naýqastardy ońaltý bólimshesi ashylyp, jumys isteýde. Medıtsınalyq mekemede osy 8 aıdyń ishinde 580 adam emdeý kýrsynan ótti, olardyń basym kópshiligi qarttar, dep habarlaıdy QazAqparat tilshisi oblystyq ishki saıasat basqarmasyna silteme jasap.

Ortalyqtyń bólim meńgerýshisi Sáýle Shákirjanovanyń aıtýynsha, negizgi mindet-ókpeniń jeldetilýin, gaz almasýdy jáne bronhtardyń klırensin jaqsartý, uzaqqa sozylǵan aýrýdan keıin mazasyzdyq pen depressııa belgilerin jeńildetý, aýyrsynýdan keıingi asqynýlardyń qaýpin azaıtý, bulshyqet álsizdigin túzetý, múgedektikti azaıtý.

«Kez kelgen aýrýdan keıingi ońaltý sharalary ońaltý kórsetkishterimen baǵalanady. Bul tynys alý aýrýlary bar, sonyń ishinde COVID-19 pnevmonııasy, sondaı-aq ókpe ıntýbatsııasynan keıin, ókpe fýnktsııasy tómendegen jáne aýrýhanada uzaq ýaqyt bolǵan naýqastardyń kórsetkishteri. Tynys alý aýrýlary, onyń ishinde COVID-19 pnevmonııasy bar eresekter medıtsınalyq ońaltýdyń úshinshi kezeńine jatady. Mundaı naýqastarǵa ońaltý qajet, olar ońaltýdyń úshinshi kezeńiniń ólshemderine sáıkes keledi jáne qalpyna keltirý eminen qaýipsiz óte alady», - deıdi dáriger.

Sondaı-aq oblys emhanalarynda da ońaltý kýrsynan ótýge bolady. «Via Medis Kokshetau» emhanasy bas dárigeriniń emdeý-aldyn alý jumysy jónindegi orynbasary Gúlnázııa Zulqarnaevanyń aıtýynsha, ambýlatorııalyq ońaltý postkovıdtyq emdeý keshenine kiredi.

«Árbir naýqas aýrýdan keıin reabılıtologtyń qabyldaýynan ótedi. Maman arnaıy drenajdy massajdy, tynys alý gımnastıkasynyń belgili bir ádisterin, fızıoterapııany qamtıtyn jeke emdeý baǵdarlamasyn belgileıdi. Onyń ishinde psıhologııalyq jáne áleýmettik beıimdelý kórsetiledi», - dep atap ótti Gúlnázııa Zulqarnaeva.

Aıta keteıik, Aqmola oblysynda pandemııa bastalǵaly beri COVID-19 zerthanalyq rastalǵan 68 721 jaǵdaı tirkelgen, onyń 55028 sımptomdy, 10693 sımptomsyz vırýs tasymaldaýshy naýqastar.