Aqmola oblysynda burqasyn jel Jańa jyldyq shyrshany qulatty
KÓKShETAÝ. QazAqparat – Aqmola oblysynyń Makınsk qalasynda burqasyn jel Jańa jylǵa arnap bezendirilgen shyrshany qulatty. Bul týraly jergilikti turǵyndar áleýmettik jelide jarııalady, dep habarlaıdy QazAqparat tilshisi.
Áleýmettik jelide taraǵan sýretterge qaraǵanda, qalanyń ortalyq alańynda ornatylǵan shyra jeldiń kúshine shydamaı qulaǵan. Jeli qoldanýshylar qulaǵan shyrany qyzý talqylýda. Pikir bildirýshilerdiń biri shyrshanyń qasynda sýretke túsip úlgermedik dep ókinish bildirse, endi biri sapasyz ornatqan adamdardy synǵa alýda.
Degenmen, qala bıligi tez arada qıraǵan shyrshany jurttyń kózine kórsetpeı, ortalyq alańnan alyp ketti.
