Aqmola oblysynda Býrabaı kýrortynyń jazǵy maýsymǵa daıyndyǵy pysyqtaldy
KÓKShETAÝ. QazAqparat - Aqmola oblysynda Býrabaı kýrortynyń jazǵy maýsymǵa daıyndyǵy pysyqtaldy, dep habarlaıdy QazAqparat tilshisi óńir basshysynyń týrızm jónindegi keńesshisi Marat Iǵalıge silteme jasap.
Aımaq basshysy Málik Myrzalınniń tóraǵalyǵymen jıynda 2018 jyldyń jazynda ótkizý josparlanǵan sharalar pysyqtaldy. Ótken jyly Býrabaı kýrorty aýmaǵynda serıfıkattaýdan ótken 3 nysan tirkeldi. Sońǵy aılarda oblys ákiminiń tapsyrmasyna sáıkes týrıster úshin qyzmet jáne servıstiń sapasyn arttyrý maqsatynda otel ıelerine juldyzdy arttyrý boıynsha túsindirý jumystary júrgizilýde.
«Osynyń nátıjesinde búgingi tańda 13 nysan sertıfıkattaýdan ótti. Taǵy 6 otel sanat alý úshin qajetti qujattaryn ázirleýde. Jaz maýsymy bastalǵansha sertıfıkat alǵan qonaq úılerdiń sanyn 26-ǵa deıin jetkizý josparda bar», dep jazdy M.Iǵalı óz paraqshasynda.
Osy rette, Málik Myrzalın Aqmola oblysynyń qonaq úı naryǵyn damytý jáne qyzmet kórsetý sapasyn basqarý mehanızmin qalyptastyrýda óńirdiń týrıstik saıasaty qonaq úılerge sertıfıkat berýdi odan ári shıratýǵa baǵyttalýy tıis ekenin atap ótti.
Aımaq basshysy tıisti memlekettik organdarǵa týrısterdiń qonyp, demalatyn oryndarynda qaýipsizdik sharasyn qamtamasyz etýdi tapsyrdy. Sonymen qatar jaqynda Kemerevoda bolǵan qaıǵyly oqıǵa tárizdi keleńsizdikterge jol bermeýge shaqyrdy. Osy maqsatta kýrortty aımaqta kez kelgen týrıst qońyraý shalyp, kómek jáne aqparat suraı alatyndaı biryńǵaı baılanys nómirin engizýdi tapsyrdy. Oǵan qosa, Býrabaı kýrortty aımaǵynda qosymsha jol jáne aqparat belgilerin ornatý josparlanǵan.
Býrabaı aýdany ákimine kýrortty aımaqta týrıster úshin sapaly dárethanalar ornatýdy, tazalyq pen qoǵamdyq tártipti baqylaýda ustaý mindetin júktedi. Jaqynda kempıng jáne avtoturaq alańdary ashylýy tıis.
Jıyn sońynda aımaq basshysy Býrabaı kýrortynda ótetin sharalardy jazǵy maýsym bastalǵansha jurtshylyqqa tanystyrýdy júktedi.
