Aqmola oblysynda bý qazandyǵy jarylyp, 1 adam mert boldy
KÓKShETAÝ. QazAqparat - Aqmola oblysynda bý qazandyǵy jarylyp, 1 adam kóz jumdy jáne taǵy eki kisi zardap shekti, dep habarlaıdy QazAqparat tilshisi.
«Oqıǵa qarashanyń 23-i kúni Zerendi aýdanynyń Prırechnoe aýylynda boldy. Bul týraly aqparat aýdandyq TJB kezekshilik bólimine kúndizgi saǵat 16:15-te tústi. Nysandaǵy bý qazandyǵynyń jarylýy saldarynan 1 adam kóz jumyp, ekeýi zardap shekti» dep túsindirdi QazAqparat tilshisiniń saýalyna Aqmola oblysy boıynsha TJD órt qaýipsizdigi salasyndaǵy baqylaý jáne aldyn alý qyzmeti basqarmasynyń bas mamany Dýman Dáleshov.
Vedomstvonyń málimeti boıynsha, qazirgi kezde adam ólimine ákelip soqtyrǵan tótenshe jaǵdaıdyń sebebi men materıaldyq shyǵyn kólemi anyqtalý ústinde.
Aldyn ala málimetterge qaraǵanda, bý qazandyǵy jaqynda iske qosý josparlanyp otyrǵan saýda úıi jáne dúken ornalasqan ǵımaratta bolǵan.
