Aqmola oblysynda brakonerlikpen aınalysqan 7 turǵyn ustaldy
KÓKShETAÝ. QazAqparat - Aqmolalyq tártip saqshylary zańsyz ań aýlaýmen aınalysqan elordanyń 7 turǵynyn qolǵa túsirdi, dep habarlaıdy QazAqparat Aqmola oblystyq Polıtsııa departamentiniń baspasóz qyzmetine silteme jasap.
Vedomstvonyń málimetterine qaraǵanda, Astananyń 7 turǵyny 1 jeltoqsan kúni Aqkól aýdanyndaǵy «Dombyraly» sharýashylyǵynyń aýmaǵynda kólikterimen birge qolǵa tústi. Tártip saqshylary olardy ańshylyq sharýashylyǵynyń qyzmetkerlerimen birlesip júrgizgen reıd barysynda ustady.
«Tekserý barysynda polıtseıler qarda júrýge arnalǵan tehnıka, myltyqtar men 4 eliktiń etin tapty. Tabıǵatqa keltirilgen zııannyń mólsheri anyqtalýda. Zańsyz ańshylyq áreketi boıynsha sotqa deıingi tergeý júrgizilip jatyr, zattaı aıǵaqtar bar»,-dep habarlady óńirlik Polıtsııa departamentiniń baspasóz qyzmeti.
Tártip saqshylarynyń aıtýynsha, brakonerlik áreketterdi anyqtaý jáne onyń jolyn kesý basty nazarda turǵan másele. Oblys aýmaǵynda keshendi reıd sharalary uıymdastyrylýda. Sharaǵa orman jáne ańshylyq sharýashylyǵynyń qyzmetkerleri de tartyldy.
«Aıta keteıik, zańsyz ańshylyq úshin QR QK-niń 337 baby boıynsha qylmystyq jaýapkershilik qarastyrylǵan. Ol mal-múlkin tárkileı otyryp, kináli azamatqa aıyppul salý, bas bostandyǵynan aıyrý, keltirilgen shyǵynnyń ornyn toltyrýdy qarastyrady»,-deıd vedomstvo ókilderi.
Polıtsııa qyzmetkerleri jyl basynan beri zańsyz ańshylyq jasaýdyń 17 áreketin anyqtaǵan.
