Aqmola oblysynda bolǵan iri jol-kólik apatynda qaza bolǵandardyń týystaryn qarsy alý jáne olarǵa qajetti kómek berý úshin sharalar qabyldandy
ASTANA. 20 tamyz. QazAqparat - Aǵymdaǵy jyldyń 19 tamyzynda shamamen saǵat 20:50-de Almaty-Ekaterınbor tas jolynyń 1309-shy shaqyrymynda iri jol-kólik oqıǵasy oryn aldy, dep habarlady Aqmola oblystyq ІІD-niń baspasóz qyzmetinen.
Shaqpaqtas tıelgen «ShANSI» markaly júk kóligin júrgizip kele jatqan Astananyń 34 jastaǵy turǵyny elordaǵa qaraı jol júrip bara jatyp, joldyń qarsy jolaǵyna shyǵyp ketip, 1960 jylǵy qaraǵandylyq azamat júrgizip kele jatqan «Astana-Qaraǵandy» baǵytyndaǵy «Iatong» avtobýsymen soqtyǵysyp qaldy.
Olarǵa avtobýstyń artynda kele jatqan Qaraǵandy oblysynyń Nurataldy aýylynyń 41 jastaǵy turǵyny júrgizip kele jatqan «Aýdı-100» kóligi de soqtyǵysty. Kóliktiń ishinde 4 adam otyrdy.
Jol apaty saldarynan oqıǵa ornynda 14 adamnyń múrdesi anyqtaldy, olardyń arasynda 7 er adam, 6 áıel jáne 5-7 jas aralyǵyndaǵy 1 qyz bala boldy. Avtobýsta barlyǵy 26 adam otyrǵan edi.
Múrdelerdi qaraý kezinde olardan tabylǵan qujattar arqyly olardyń aty-jónderi anyqtaldy.
Túrli dene jaraqattaryn alǵan basqa jolaýshylar Astana qalasy men Aqmola oblysyndaǵy Arshaly aýdany ortalyǵynyń emdeý mekemelerine jetkizildi.
7 adam Astanadaǵy travmatologııa jáne ortopedııa ǵylymı-zertteý ınstıtýtyna jatqyzyldy. 7 adam «Jedel medıtsınalyq kómek respýblıkalyq ǵylymı ortalyǵy» AQ-ǵa ornalastyryldy. Sot-medıtsınalyq saraptama taǵaıyndaldy.
Zardap shegýshilerdiń tizimderi jasaldy, olar barlyq medıtsınalyq mekemeler men ІІB-niń jaýapty qyzmetkerlerinde bar, qalǵan qaza tapqan adamdardyń esimderin anyqtaý boıynsha kezek kúttirmeıtin sharalar qabyldanýda.
Zardap shekkenderdiń týystaryn kútip alý jáne olarǵa barlyq uıymdastyrýshylyq máselelerdi sheshýde qajetti kómek kórsetý boıynsha sharalar uıymdastyrylýda. Oqıǵa ornyn qaraý, apatty tehnıkany kóshirý jáne kóliktik quraldardyń tas jolynda bógetsiz ótýin qamtamasyz etý sharalary jalǵasýda.
Atalǵan oryndardaǵy barlyq sharalardy ІІD-niń basshylyǵy júzege asyrýda.
Atalǵan faktimen QR QK-niń 3 bólimi 296-babyndaǵy (abaısyzda eki nemese odan da kóp adamnyń ólimine ákelip soqtyrǵan jol qozǵalysy erejelerin buzý) qarastyrylǵan qylmys belgileri boıynsha qylmystyq is qozǵaldy. Atalǵan baptyń sanktsııasy bes jyldan on jylǵa deıin bas bostandyǵynan aıyrý jazasyn qarastyrady.
