Aqmola oblysynda Bógenbaı batyrdyń nemeresiniń aty kóshege berildi

KÓKShETAÝ. QazAqparat - «Rýhanı jańǵyrý» baǵdarlamasy aıasynda Qanjyǵaly Bógenbaı batyrdyń nemeresi Bapan bıdiń esimi Kókshetaýdyń irgesindegi Birlik kentindegi kóshege berildi, dep habarlaıdy QazAqparat tilshisi.

Buryn Novoselov atanǵan kóshe endi qazaqtyń ataqty bıi, sońynda ólmes ónelgeli sózderi men jaqsy isteri qalǵan tarıhı tulǵa Bapan bıdiń esimimen atalatyn bolady. Sharaǵa qatysqa Aqmola oblystyq sottyń tóraǵasy Dosjan Ámirov Aqmola-Kókshe óńirinen ejelden halyqqa tanymal sal-seriler men aýzy dýaly bılerdiń kóp shyqqandyǵyn aıta kele, búgingi sottyń ertedegi bıler ınstıtýtynan alary kóp ekendigin atap ótti.

«Sońynda ólmes sózderi, ónegeli isteri qalǵan Bógenbaı batyrdyń nemeresi Bapan bıdiń esiminiń oblys ortalyǵyndaǵy kóshege berilýi uly tulǵalarymyzdyń esimin el esinde saqtaýǵa jasalǵan jaqsy qadam», - dep atap ótti  Dosjan Ámirov.
 

Aıta keteıik, sońǵy 2 jylda Kókshetaý qalasyndaǵy 100 kóshege jańa ataý berildi. Bıyl jyl basynan beri 50 kósheniń ataýy ózgertilgen. Buryn Zapadnaıa, Jeleznodorjnaıa sııaqty atalyp kelgen kóshelerge elge eńbegi sińgen tarıhı tulǵalarymyzdyń esimderi berilip otyr.