Aqmola oblysynda «Bizdiń qanymyz bir» aktsııasy ótti
KÓKShETAÝ. QazAqparat - Aqmola oblysy boıynsha qylmystyq-atqarý júıesi departamentinde «Bizdiń qanymyz bir» aktsııasy ótti, dep habarlaıdy QazAqparat tilshisi vedomstvonyń baspasóz qyzmetine silteme jasap.
Vedomstvonyń málimetinshe, koronavırýs pandemııasyna qarsy kúresý úshin engizilgen tótenshe jaǵdaı rejımi kezindegi karantındik shekteý sharalaryna baılanysty Aqmola oblystyq densaýlyq saqtaý basqarmasy janyndaǵy oblystyq qan ortalyǵy qan tapshylyǵyn bastan keshýde. Koronavırýstyq pnevmonııany emdeýde naýqastyń ómiri úshin kez kelgen ýaqytta qan qajet bolyp qalý múmkin.
Sol sebepti, COVID-19 jaǵdaıynda donorlyq qan bankin toltyrý qajettiligi týraly medıtsına qyzmetkerleriniń ótinishine qylmystyq-atqarý júıesi departamenti apparaty men bólimsheleriniń jas qyzmetkerleri qoldaý bildirdi.
Aktsııa barysynda 40-qa jýyq qyzmetkerden Aqmola oblysy boıynsha qylmystyq-atqarý júıesi departamentindegi front-ofısinde ornalasqan oblystyq qan ortalyǵynyń jyljymaly brıgadasy qan aldy.
«Adamnyń ómiri men densaýlyǵy úshin kómek qolyn sozý kez kelgen adamnyń azamattyq boryshy dep esepteımin», - deıdi ETs-166/25 túzetý mekemesiniń qyzmetkeri Ivan Gavrılenko.
