Aqmola oblysynda bıylǵy jyl sońynda qus fabrıkasy iske qosylady
KÓKShETAÝ. QazAqparat - Bıylǵy jyldyń 4-shi toqsanynda Aqmola oblysynyń Bulandy aýdanynda Indýstrııalandyrý kartasy sheńberinde elimizdegi eń iri qus fabrıkasy paıdalanýǵa beriledi, dep habarlaıdy QazAqparat HAA tilshisi oblystyq ishki saıasat basqarmasyna silteme jasap.
Aımaq basshysynyń orynbasary Qanat Ydyrysov bastaǵan óńirge ınvestıtsııa tartý boıynsha taldaý toby atalmysh jobanyń júzege asyrylý barysymen tanysty.
«Makınsk qus fabrıkasy» JShS ókilderiniń aıtýynsha, tiri salmaqtaǵy jyldyq qýaty 60 myń tonnany quraıtyn bolashaq qus fabrıkasy 2015-2019 jyldar aralyǵynda eki kezeńmen salynyp bitpek. Jobaǵa quıylatyn ınvestıtsııanyń kólemi 41 mıllıard teńgeden astam shamasynda bolmaq.
«Jobany júzege asyrý barysynda «QR 2015-2019 jyldarǵa arnalǵan ındýstrııalyq-ınnovatsııalyq damý baǵdarlamasy», «Bıznestiń jol kartasy-2020» jáne «Agrobıznes-2020» tárizdi memlekettik baǵdarlamalarǵa qatysý kózdelip otyr. Qus fabrıkasyn salý jańadan turaqty 900 jumys ornynyń ashylýyna múmkindik beredi. Sondaı-aq, Bulandy aýdanynyń qýat kózderimen jáne sýmen jabdyqtalý júıesin nyǵaıtady jáne óńirdegi shaǵyn jáne orta bıznestiń damýyna septigin tıgizedi dep boljanyp otyr. Joba jelilik qurylys kestesine saı, aldymen ınkýbator paıdalanýǵa berilip, árqaısysynda 6 taýyq qorany biriktiretin 8 alań, qus etin jáne qaldyqtardy óńdeý zaýyty men bólimi, ekologııalyq jáne tehnologııalyq qondyrǵylardy ornatý jumystary iske asyrylady», deıdi seriktestik ókilderi.
Sonymen qatar, taldaý toby aýdandaǵy «Politerm», «TransTechMash LTD», «QazTETs», «TransLogistics» jáne «Makınsk mehanıkalyq-quıma zaýyty» seriktestikterin de aralap kórdi.
Atalmysh kásiporyndardyń turaqty jumysynyń arqasynda Bulandy aýdanynda aǵymdaǵy jyldyń birinshi toqsynynda ónerkásip óniminiń kólemi 938,1 mıllıon teńgeni qurady.
