Aqmola oblysynda bıyl aýyl halqyn sýmen qamtý úshin 45 joba iske asady

NUR-SULTAN. QazAqparat – Aqmolada bıyl aýyl turǵyndaryn sýmen qamtý maqsatynda 45 joba qolǵa alynady. Bul týraly Úkimet otyrysynda Premer-Mınıstr Álıhan Smaıylovtyń saýalyna jaýap bergen Aqmola oblysynyń ákimi Ermek Marjyqpaev aıtty, dep habarlaıdy QazAqparat tilshisi.

«Tselınograd aýdanynyń keıbir eldi mekenine qubyr júrgizilmegen. Sý aýyldarǵa deıin jetpegen. Máseleni qashan sheshesizder?» dep surady Úkimet basshysy óńir ákiminen.

Saýalǵa jaýap bergen óńir basshysy elorda tóńiregindegi 34 eldi mekenniń 25-i sýmen tolyq qamtamasyz etilgenin aıtty.

«Arshaly jáne Tselınograd aýdandarynda 6 joba júzege asyrylyp jatyr. Talapker jáne Qajymuqan aýyldarynda sý taratý toraptarynyń qurylysy aıaqtaldy. Olardy sý kózine qosý úshin Kenjebaı jáne Raqymjan ken oryndarynan sý tartqysh qurylysyna jobalyq-smetalyq qujat ázirlenip jatyr. Saraptama qorytyndysyn alý osy jyldyń úshinshi toqsanyna josparlanǵan. Joba Tselınograd aýdanynyń 19 aýylyn sýmen qamtıdy. Sý taratqysh qurylysy kezeńinde sý berý ýaqytsha keshendi bloktar arqyly júzege asady», - dedi oblys ákimi.

Ermek Marjyqpaevtyń atap ótýinshe, qazir sýmen jabdyqtaý jáne sý taratý boıynsha 17 mlrd teńgege 63 joba iske asyrylyp jatyr.

Onyń ishinde osy jyly 45 joba iske asady. 18 joba qurylysy 2023 jyly qolǵa alynady.

Bul jobalar 6,5 myń adamdy sapaly aýyz sýmen qamtamasyz etedi.

Sonymen qatar bıyl 13 jobanyń jobalyq-smetalyq qujaty daıyn bolady. 18 eldi mekende sý kózderin izdeý jumysy qolǵa alynǵan.