Aqmola oblysynda bıyl 7 adamdy kene shaqqan
«Sáýir aıynda kene shaǵýdyń jeti jaǵdaıy tirkeldi, onyń beseýi Kókshetaý qalasynda, bireýi Zerendi aýdanynda jáne bireýi Stepnogor qalasynda», - deıdi Aınagúl Mýsına.
Oblystyń bas memlekettik sanıtarlyq dárigeriniń aıtýynsha, Sandyqtaý aýdany 2018 jyldan bastap kene entsefalıti boıynsha endemıkalyq aımaq bolyp tanyldy.
Alaıda keneler shekara mańyndaǵy aýmaqtarǵa jyljı alady, sondyqtan kene entsefalıtin juqtyrýdan saqtaný kerek. Óıtkeni jyl saıyn oblys aýmaǵynda 466-dan astam kene shaǵý jaǵdaıy tirkeledi jáne onyń eń kóbi (50 paıyzdan astamy) kóktem aılarynda bolady.
«Kene shaqqan jaǵdaıda úsh kún ishinde der kezinde medıtsınalyq kómekke júginip, ımmýnoglobýlınmen seroprofılaktıka alý qajet. Al 3 kúnnen asa ýaqyt ótkennen keıin júgingen kezde seroprofılaktıka júrgizilmeıdi», - dep tolyqtyrdy Aınagúl Mýsına.
Osy rette ol kene shaqqan adam birden jaqyn mańdaǵy medıtsınalyq mekemege baryp, dárigerdiń kómegine júginýi qajettigin eske salady.
