Aqmola oblysynda bıyl 5,1 mıllıon gektar jerge dán sebiledi
KÓKShETAÝ. QazAqparat - Aqmola oblysynda bıylǵy jyly barlyǵy 5,1 mıllıon gektar alqapqa dán sebiledi. Onyń 4,6 mıllıon gektary dándi, 277,6 myń gektary maıly daqyldar.
Bul týraly óńirlik kommýnıkatsııalar qyzmetinde ótken brıfıngte oblystyq aýyl sharýashylyǵy basqarmasynyń basshysy Erkesh Álenov málim etti, dep habarlaıdy QazAqparat tilshisi.
Basqarma basshysynyń málimetinshe, 807 myń ga aýmaqta úsh rettik par óńdeý (bul 2020 jylǵy deńgeıden joǵary 48,5 myń ga), 1 mln. ga (2020 j. - 881,7 myń ga) aýmaqta súdiger jyrtý jumystary júrgizildi.
«Ótken kúzde oblys dıqandary 2022 jylǵa qajetti 529,8 myń tonna tuqym qoryn jasady. Bıylǵy jyly barlyǵy 5,1 mıllıon gektar alqapqa dán sebiledi. Onyń 4,6 mıllıon gektary dándi, 277,6 myń gektary maıly daqyldar úlesinde», - dedi Erkesh Álenov.
Basqarma basshysy atap ótkendeı, mal sharýashylyǵynyń jem-shópke degen qajettiligin tolyq qamtamasyz etý maqsatynda oblysta jem-shóp daqyldarynyń egis alqaptaryn ulǵaıtý boıynsha maqsatty jumystar júrgizilýde. Bıyl júgerini esepke alǵanda, jemshóp daqyldarynyń alańyn 195 myń ga deıin keńeıtý josparlanǵan. Bul 2021 jylǵa qaraǵanda 19,7 myń ga artyq. Kartop pen kókónister, tıisinshe 16,8 jáne 2,7 myń ga alańǵa ornalastyrylatyn bolady. Topyraq qunarlylyǵyn arttyrý, óndiriletin ónimniń ónimdiligi men sapasyn arttyrý maqsatynda oblysta jyl saıyn mıneraldy tyńaıtqyshtardy satyp alý kólemi ulǵaıýda.
«Máselen, 2021 jyly oblystyń aýyl sharýashylyǵy taýaryn óndirýshileri 90 myń tonna mıneraldy tyńaıtqyshtar satyp aldy (onyń ishinde 67,2 myń tonna sýbsıdııalanǵan), bul 2020 jyldan 24 myń tonnaǵa artyq (2020 jyly - 65,9 myń tonna, 65,9 myń tonna sýbsıdııalanǵan). Bıylǵy jyly osy baǵyttaǵy jumystar jalǵasatyn bolady. Bul maqsatqa oblys agrarılerin memlekettik qoldaý úshin tyńaıtqyshtar satyp alýǵa 50 paıyzǵa deıingi shyǵyndardy óteý boıynsha 3,2 mıllıard teńge bólindi», - dep tolyqtyrdy Erkesh Álenov.
Brıfıngte aıtylǵandaı, sapaly tuqymnyń qoljetimdiligin arttyrý úshin aýyl sharýashylyǵy basqarmasy olardy satyp alýdy sýbsıdııalaý bóliginde memlekettik qyzmet kórsetedi. Aýyl sharýashylyǵy quralymdary naqty satyp alynǵan elıtalyq tuqymdar úshin 70 paıyz (daqyldyń egis alańynyń 15% - ynan aspaıtyn) jáne birinshi kóbeıtilgen jáne 1-urpaq býdandarynyń tuqymdary úshin 50 paıyz (alqaptyń 20% - ynan aspaıtyn) mólsherinde shyǵyndardy óteýge sene alady.
Osy jylǵa arnalǵan sýbsıdııalar kólemi 789 mıllıon teńgeni quraıdy, bul jalpy kólemde joǵary reprodýktsııaly tuqymdardyń úles salmaǵyn 85 paıyzǵa deıin ulǵaıtýǵa múmkindik beredi. Basqarma ósimdikterdi asa qaýipti zııankester men aýrýlarǵa qarsy qorǵaý quraldaryn qoldaný alańyn keńeıtý boıynsha da jumysty jalǵastyrady. Atap aıtqanda, bıyl bólingen 8 mıllıard teńgeden astam qarajat esebinen fermerlerdiń pestıtsıdterdi satyp alý shyǵyndaryn 50 paıyzǵa deıin arzandatý kózdelgen.
«Agroónerkásiptik keshendi damytýdyń mańyzdy máseleleriniń biri mashına-traktor parkin jańartý bolyp tabylady. 2021 jyldyń qorytyndysy boıynsha oblystyń AShTÓ jalpy somasy 63 mıllıard teńgege 2187 birlik aýyl sharýashylyǵy tehnıkasyn satyp aldy. Onyń ishinde traktorlar - 465 birlik, kombaındar - 345 birlik jáne egis keshenderi - 101 birlik. Tehnıka parkin ulǵaıtýda ınvestıtsııalyq sýbsıdııalaý jáne tehnıka lızıngi boıynsha syıaqy mólsherlemelerin sýbsıdııalaý sııaqty memlekettik qoldaý sharalary mańyzdy ról atqardy. Bıylǵy egis naýqanyna shamamen 14,8 myń traktor, 16,4 myń tuqym sepkish jáne 1,4 myń ónimdiligi joǵary egis kesheni qatysatyn bolady. Aýyl sharýashylyǵy tehnıkasynyń egis naýqanyna daıyndyǵy 90 paıyzdy quraıdy», - dep túıindedi Erkesh Álenov.
