Aqmola oblysynda birneshe mektep oqýshylaryna koronavırýs muǵalimderden juqqan

KÓKShETAÝ. QazAqparat - Aqmola oblysynda 2020-2021 oqý jylynyń birinshi toqsanynda oqýshylar arasynda koronavırýs juqtyrýdyń (7/18) 25 jaǵdaıy, ekinshi toqsanda 211 jaǵdaıy (80/131), úshinshi toqsanda 65 jaǵdaı (30/35) tirkeldi, dep habarlaıdy QazAqparat tilshisi.

Aqmola oblysynyń bas memlekettik sanıtarlyq dárigeri Aınagúl Mýsınanyń aıtýynsha, oqýshylar arasynda koronavırýs juqtyrǵandar Kókshetaý qalasynda eń kóp tirkeldi - 143, budan keıin Stepnogor qalasy tur - 16, al Býrabaı aýdanynda - 19, Sandyqtaý aýdanynda - 18, Zerendi aýdanynda - 12, Bulandy aýdanynda - 11, Atbasar aýdanynda - 9.

«Jalpy bilim beretin mektepterdiń oqytýshylary arasynda 108 jaǵdaı tirkelgen, onyń ishinde 64 (60%) shtattyq rejımde jumys istedi. Shtattyq rejımde oqyǵan Zerendi aýdanynyń Qyzylegis aýylyndaǵy orta mekteptiń 4 synyp oqýshysyna koronavırýs zerthanada rastalǵan muǵalimnen juqqany anyqtaldy. Kókshetaý qalasynyń mektepterinde de oqýshylardyń muǵalim jáne týystarynan juqtyrǵany belgili boldy», - dedi Aınagúl Mýsına.

Ol atap ótkendeı, óńirdiń bilim berý obektilerine júrgizilgen jospardan tys tekserýlerdiń nátıjeleri boıynsha 11 mektepte (Zerendi aýdanynda – 7, Arshaly aýdanynda – 3, Qorǵaljyn aýdanynda – 1) bakterıtsıdti shamdardyń bolmaýy, dezınfektsııalaý quraldarynyń jetkiliksiz bolýy, áleýmettik qashyqtyqtyń saqtalmaýy sııaqty karantın talaptarynyń buzylǵandyǵy anyqtaldy.

«Anyqtalǵan zań buzýshylyqtar boıynsha 358370 teńge somasyna 11 ákimshilik aıyppul salynyp, nusqama berildi», - dedi Aınagúl Mýsına.