Aqmola oblysynda birqatar sheneýnik koronavırýske qarsy vaktsına saldyrdy
KÓKShETAÝ. QazAqparat – Aqmola oblysynda koronavırýske qarsy reseılik «Spýtnık V» vaktsınasyn salý jumystary júrgizilýde. Aqmola oblysy sanıtarlyq-epıdemıologııalyq baqylaý departamentiniń málimeti boıynsha, saǵat 11:00 jaǵdaı boıynsha óńirde 42 adam vaktsına aldy, dep habarlaıdy QazAqparat tilshisi.
Birinshi bolyp vaktsına Aqmola oblysy ákiminiń orynbasary Ǵalymjan Ábdihalyqovqa, DSEK basshysy, oblystyń bas memlekettik sanıtarlyq dárigeri Aınagúl Mýsınaǵa, Densaýlyq saqtaý basqarmasy basshysynyń orynbasary Narıman Syzdyqovqa, Aqmola oblystyq kópbeıindi aýrýhananyń dırektory, qalalyq máslıhat depýtaty Nurlan Jarovqa, DSEK orynbasary Sáýle Sádýaqasovaǵa, Kókshetaý qalasynyń ESEK basshysy Qanat Ysqaqovqa, Aqmola oblysy ákimi apparatynyń basshysy Azamat Qapyshevqa jáne taǵy 30-dan astam adamǵa salyndy. Birinshi kezekte vaktsına alǵandar - bul bólim meńgerýshileri men aımaq bólimderiniń basshylary.
Atap aıtsaq, Aqmola oblysynyń ákimi Ermek Marjyqpaev jaqynda koronavırýsten emdelip shyqty. Sol sebepti, oǵan alty aıdan keıin ǵana egýge bolady. Aımaq ákiminiń basqa orynbasarlary da jazda koronavırýspen aýyryp shyqty.
Josparǵa sáıkes, 2021 jyldyń 1 aqpanyna Aqmola oblysynda 120 adam vaktsına alýy tıis.
Búgin Qazaqstanda koronavırýs ınfektsııasyn juqtyrý jáne taratý táýekeli joǵary sanattardy koronavırýsqa qarsy vaktsınalaý bastaldy. Qazaqstanda vaktsına erikti túrde salynady.
1 aqpannan bastap Qazaqstanda Reseıde shyǵarylǵan «Spýtnık V» vaktsınasyn paıdalana otyryp, KVI-ǵa qarsy vaktsınatsııa bastalady.
