Aqmola oblysynda birqatar respýblıkalyq jolda qozǵalysqa tyıym salyndy
KÓKShETAÝ. QazAqparat – Aqmola oblysynda respýblıkalyq mańyzy bar joldardyń birqatar ýchaskesi jabyldy, dep habarlaıdy QazAqparat tilshisi «QazAvtoJol» UK» AQ baspasóz qyzmetine silteme jasap.
Vedomstvonyń málimeti boıynsha, 6 aqpan, saǵat 19:45-ten bastap aýa raıynyń nasharlaýyna baılanysty (kóktaıǵaq, qar aralas jańbyr, boran) respýblıkalyq mańyzy bar avtojoldardyń birqatar ýchaskesinde kóliktiń barlyq túrleri úshin qozǵalysqa tyıym salyndy.
Atap aıtqanda:
- «Ekaterınbor-Almaty» avtojolynyń 917-1247 shaqyrym aralyǵy (Jaqsy kenti - Nur-Sultan qalasy);
- «Qostanaı-Áýlıekól-Surǵan» avtojolynyń 232-260 shaqyrym aralyǵy (Qostanaı oblysy shekarasy - Sýrgan kenti);
- «Jezqazǵan Petropavl» avtojolynyń 337-595 shaqyrym aralyǵy (Qostanaı jáne Soltústik Qazaqstan oblystary shekarasy);
- «Jaqsy-Esil-Buzylyq» avtojolynyń 0-65 shaqyrym aralyǵy (Jaqsy-Esil).
Eske salaıyq, buǵan deıin respýblıkalyq eki avtojolda qozǵalysqa shekteý qoıylǵanyn jazǵan edik.
Sınoptıkter elimizdiń birqatar óńirinde eskertý jarııalady.
