Aqmola oblysynda birqatar kásiporynnyń jumysy jandandy
KÓKShETAÝ. QazAqparat – Mamyrdyń 4-nen bastap Aqmola oblysynda karantın rejımi jeńildetile bastady.
Sanıtarlyq-epıdemıologııalyq qaýipsizdik boıynsha talaptardy saqtaı otyryp, birqatar uıym jumysyn jandandyrdy, dep habarlaıdy QazAqparat tilshisi oblystyq ishki saıasat basqarmasyna silteme jasap.
«Búginen bastap aýmaǵy 500 sharshy metrden aspaıtyn azyq-túlikten ózge zattardy saıdalaıtyn dúkenderge keshki saǵat 17:00-den keıin jumys isteýge ruqsat berildi. Sonymen birge, fotosalon, gúl satatyn kıoskiler, jyljymaıtyn múlik agenttikteri, jarnama agenttikteri, advokattar keńsesi, shaǵyn nesıe uıymdary, saqtandyrý kompanııalary, aqsha aıyrbastaý pýnktteri, aqparattyq-kommýnıkatsııa tehnologııa kompanııalary, zoodúkender, jáne aýyl sharýashylyǵy jem-azyqtaryn satatyn dúkender jumysyn bastady. Sondaı-aq, sıymdylyǵy 20-dan aspaıtyn qoǵamdyq monshalar men saýnalarda ashylady», - delingen oblystyń bas sanıtar dárigeriniń qaýlysynda.
Qatań karantınnen keıin jumysyn bastaǵan Sandyqtaý aýdanynyń Balqashın aýylyndaǵy kásipker Aleksandr Jdanov:
«Meniń qurylys materıaldarym jáne sharýashylyq taýarlaryn satatyn jeke dúkenim bar. Karantın rejımi meniń jeke kásibime keri áserin tıgizdi. Naýryzdyń 23-nen bastap dúken jabylyp, onlaın tapsyrys qabyldaı bastadyq. Úsh jas jumysshym jumyssyz qalǵandyqtan 42500 teńge járdemaqy aldy. Qazirgi tańda dúken ashylyp, sanıtarlyq talaptarǵa saı jumys isteýde. Bir rette eki adam qyzmet kórsetemiz, dızenfektsııa júrgizip, maska jáne qolǵap rejımi saqtalǵan», - deıdi kásipker.
Aıtalyq, óńirde sáýir aıynyń sońynda turǵyndarǵa úı aýlasynda serýendeýge, saıajaıǵa barýǵa avtobýspen júrýge ruqsat berildi. Sonymen birge, shashtaraz, sán salony, medıtsınalyq ortalyq, stomatlogııa, notarıýs, hımııalyq jáne kıim tazalaý oryndary jumysyn bastady. Azyq – túlik, hımııalyq jáne gıgıenalyq zattar satatyn saýda oryndarynyń jumys rejımi uzartyldy. Ónerkásiptik kásiporyndar, qurylys kompanııalary, ekinshi deńgeıli bankter men ózge de nysandar jumystaryn júrgize bastady.
