Aqmola oblysynda birinshi toqsanda 168 mektep qashyqtan jumys istedi
KÓKShETAÝ. QazAqparat - Aqmola oblysynda birinshi toqsanda 387 mektep dástúrli rejımde, 168 mektep qashyqtan jumys istedi. Bul týraly óńirlik kommýnıkatsııalar qyzmetinde ótken brıfıngte oblystyq bilim basqarmasynyń basshysy Beıbit Júsipov aıtty, dep habarlaıdy QazAqparat tilshisi.
«QR aýmaǵynda koronavırýs ınfektsııasynyń taralýyna jol bermeý jónindegi Vedomstvoaralyq komıssııanyń sheshimine sáıkes ekinshi toqsannan bastap oqýshylar sany 300 balaǵa deıin bolatyn qala jáne aýyl mektepteriniń jumysy dástúrli formatqa kóshirildi. Aqmola oblysynda birinshi toqsanda 387 mektep dástúrli rejımde, 168 mektep qashyqtan jumys istedi. Sol 168 mekteptiń ishinde oqýshylardyń sany 300 deıingi 53 mektep bar. Atalǵan mektepter jergilikti sanıtarlyq-epıdemıologııalyq qyzmetiniń tekserisinen ótse, kelesi toqsannan bastap jumystaryn dástúrli formatta jalǵastyrady. Oǵan qosa ata-analardyń ótinishi boıynsha 1 synyptan 5 synypqa deıin kezekshi synyptarda oqýǵa ruqsat etiledi. Árıne bul jaǵdaıda sanıtarlyq-dezınfektsııalyq rejımdi, maska rejımin, shahmat retimen otyrǵyzý jáne áleýmettik ara qashyqtyqty saqtaý mindetti», - dedi Beıbit Júsipov.
Sonymen birge, basqarma basshysy bıylǵy oqý jylynyń birinshi toqsanynda bilim alýshylardyń oqý jetistikterin baǵalaýda birqatar ózgerister engizilgenin atap ótti.
«1-synypta toqsandyq jáne jyldyq baǵalar qoıylmaıdy. Biraq pedagogtar bilim alýshynyń jetistikteri boıynsha ata-analarmen keri baılanys júrgizýge mindetti. Karantın, áleýmettik, tabıǵı jáne tehnogendik sıpattaǵy tótenshe jaǵdaılar kezinde 2-11 (12) synyp oqýshylarynyń oqý jetistikteri birden 10 balǵa deıin qoıý arqyly formatıvti baǵalanady. Toqsandyq baǵany qoıý kezinde formatıvti baǵalaýdyń ortasha baly eskeriledi. Formatıvti baǵalaý kezinde muǵalim sabaqta keri baılanysty júzege asyrady. Pedagog bilim alýshylardyń sanyn, keri baılanysty usyný nysany men jıiligin derbes aıqyndaıdy», - dep tolyqtyrdy Beıbit Júsipov.
