Aqmola oblysynda birge oqyǵan qatarlasyn quldyqqa satýdy josparlaǵandar anyqtaldy

Bul týraly búgin brıfıngte QR Іshki ister mınıstrliginiń resmı ókili Nurdildá Oraz málimdedi.

«Aqmola oblysynyń polıtseıleri erkinen tys jumysqa jegip qoıýdy kózdegen adam urlaý faktisiniń betin ashty. 29 naýryz kúni Jaqsy aýdandyq polıtsııa bólimshesine 20 jastaǵy balasynyń urlanǵandyǵyn aıtyp, Qıma aýylynyń turǵyny aryz túsirdi. Onyń aıtýy boıynsha, tún ortasynda beıtanys bireýler úıdiń esigin buzyp, ulyn kólikke otyrǵyzǵan kúıi belgisiz baǵytqa alyp ketken. Іzdestirý sharalary barysynda adam urlyǵyna qatysy bar Atbasar aýdanynyń 23 jastaǵy turǵynynyń tulǵasy anyqtaldy»,- dedi remı ókil. Polıtseıler kúdiktilerdi qolǵa túsirý úshin birqatar jedel izdestirý sharalaryn uıymdastyrdy. Nátıjesinde kelesi kúni Atbasar qalasyndaǵy úılerdiń birinde qylmysqa qatysy bar kúdiktilerdiń biri qolǵa tústi. Soqqyǵa jyǵylǵan jábirlenýshi de sol jerden tabyldy. Odan ári júrgizilgen is-sharalar nátıjesinde taǵy eki kúdikti - 20 jáne 22 jastaǵy jergilikti turǵyndar quryqtaldy.

«Belgili bolǵandaı, jábirlenýshi men kúdiktiler Atbasar qalasyndaǵy lıtseılerdiń birinde birge oqyǵan. Stýdenttik jyldary olardyń arasyndaǵy shıelinis osyndaı oqıǵaǵa uryndyrǵan. Kıkiljińdi birjolata sheshý maqsatymen olar jábirlenýshiniń turǵylyqty meken-jaıyna barýdy kózdeıdi. Jol boıynda biraz ishimdik ishken kúdiktiler jábirlenýshini urlap, Atbasarǵa alyp baryp, quldyqqa satýdy josparlaıdy.Qazirgi tańda ustalǵandar ýaqytsha qamaý ızolıatoryna toǵytyldy. Atalǵan qylmystary úshin olar 15 jylǵa deıin bas bostandyqtarynan aıyrylýy múmkin», -dedi N. Oraz.