Aqmola oblysynda bir túnde 138 adam qutqaryldy
KÓKShETAÝ. QazAqparat – Qatty boran Aqmola oblysynda avtokólik pen jolaýshylardyń qatynaýyna kedergi keltirip tur. Ótken túni 26-27 qańtar aralyǵynda oblys joldarynda qar qursaýynan 138 adam qutqaryldy, olardyń 13-i bala, dep habarlaıdy QazAqparat tilshisi oblystyq TJD baspasóz qyzmetine silteme jasap.
«Aqkól aýdanynda Aqkól qalasynyń beketinen «Nur-Sultan-Şýche» avtojoly ýchaskesiniń jabylýyna baılanysty, Tájikstan Respýblıkasynan Reseıdiń Túmen qalasyna baǵyt alǵan «Van Hool» jolaýshylar avtobýsy jolda qalyp, kólik ishinde bolǵan 61 adam aýdandyq mádenıet úıiniń jylytý pýnktine jetkizildi. Jolaýshynyń arasynda 2 bala bar, basqa adamdardyń eshqaısysy medıtsınalyq kómekke muqtaj emes eken. Qutqarý jumystary búkil oblys boıynsha júrgizilýde. Ótken túni 26-27 qańtar aralyǵynda oblys joldarynda qar qursaýynan 138 adam qutqaryldy, olardyń 13-i bala. Budan bólek, avtojoldardyń jabylýyna baılanysty Aqkól jáne Býrabaı aýdandaryndaǵy jylytý pýnktterine 68 adam evakýatsııalandy», - dedi Aqmola oblysy TJD bastyǵynyń orynbasary Qanat Dospaev.
Vedomstvonyń málimetinshe, eń kúrdeli jaǵdaı Ereımentaý aýdanynyń aýmaǵynda «Nur-Sultan-Pavlodar» baǵytyndaǵy avtomagıstralda qalyptasty. Atalmysh avtomagıstral 22 qańtardan bastap kóliktiń barlyq túri úshin jabyq. Alaıda avtokólikti ótkizý jol qyzmeti, TJD men Jergilikti polıtsııa qyzmeti ókilderi kólikter kolonııasyn ilestirip qajetti jerge sheıin jetkizýdi uıymdastyrdy. Osyǵan uqsas jaǵdaı Tselınograd, Aqkól, Shortandy aýdandarynyń aýmaǵynda «Nur-Sultan-Kókshetaý» baǵytyndaǵy kúre jolda da qalyptasyp otyr. Qazirgi ýaqytta blok-beketterde 601 kólik tur.
«Jalpy, oblystyń avtomobıl joldarynda qar tazalaıtyn 141 arnaıy tehnıka jumys isteýde. Onyń ishinde respýblıkalyq mańyzy bar joldarǵa 91 birlik tehnıka jáne oblystyq mańyzy bar avtojoldarǵa 50 tehnıka jumyldyrylǵan. Aqmola oblysy TJD Aqmola oblysynyń turǵyndary men qonaqtaryna aýa raıy jaqsaryp, jol ashylǵanǵa deıin eldi mekender aýmaǵynan alysqa shyqpaýǵa keńes beredi», dep tolyqtyrdy vedomstvonyń baspasóz qyzmetindegiler.
